ხვალ, 26 მაისს საქართველოს დამოუკიდებლობის დღესთან დაკავშირებით, რუსთაველის გამზირზე, კამპანია "ევრომელანომას" ფარგლებში ყველა მოქალაქეს საშუალება მიეცემა, ჯანდაცვის სამინისტროსათვის განკუთვნილ ადგილზე უფასოდ ჩაიტარონ კანის კიბოს სკრინინგის პროცედურა.
შეგახსენებთ, რომ 26 მაისი წელს განსაკუთრებულად აღინიშნება. თბილისთან ერთად სადღესასწაულო ღონისძიებებში 11 ქალაქია ჩართული: ქუთაისი, ფოთი, ზუგდიდი, ამბროლაური, მცხეთა, თელავი, ახალციხე, გორი, ოზურგეთი, რუსთავი და ბათუმი.
საქართველოს მთავრობის ადმინისტრაციის, საქართველოს კულტურისა და ძეგლთა დაცვის სამინისტროს, თავდაცვის სამინისტროს, თვითმმართველი ქალაქების ადმინისტრაციებისა და ქ. თბილისის მერიის ორგანიზებით 2014 წლის 26 მაისი დიდი სახალხო ზეიმი იქნება, სადაც თითოეულ მოქალაქეს შეეძლება მიიღოს მონაწილეობა.
12 ქალაქი ერთიანი სცენარით აღნიშნავს დამოუკიდებლობის დღეს. გადაკეტილ პროსპექტებზე არსებული კაფე-ბარები მოაწყობენ სადღესასწაულო გამოფენა-გაყიდვას; პირველი გიმნაზიის წინ „ყვავილების ზეიმის" ღონისძიება მოეწყობა, ხოლო ოპერის წინ მხატვრები განლაგდებიან; პროსპექტზე ივლიან პანტომიმისა და სხვადასხვა თეატრის მსახიობები. მოძრაობის თეატრი მცირე პერფორმანსებს დადგამს.. მთავარ გამზირზე მოეწყობა ბავშვებისთვის გასართობი ცენტრებიც.
რუსთაველის გამზირზე განთავსდება სამინისტროების კარვები, რომლებიც წარმოდგენილი იქნებიან საინფორმაციო და გასართობი კუთხით. კულტურის სამინისტროს პავილიონში მოეწყობა ხალხური რეწვის ოსტატების გამოფენა-გაყიდვა. რუსთაველის გამზირზე მოსულ სტუმრებს საქართველოს ყველა რეგიონიდან ჩამოსული ოსტატები მასტერკლასებს ჩაუტარებენ. (თიხის ხელით ამოყვანა, ქარგვა, ბატიკა და ა.შ.)
დედაქალაქში წარმოდგენილი იქნება 2 მთავარი სცენა: პარლამენტის წინ და ევროპის მოედანაზე. სადაც 12:00-21:00 საათების შუალედში წინასწარ შედგენილი პროგრამის მიხედვით გაიმართება ქართველი შემსრულებლების კონცერტები.
ამავე სცენებზე მოეწყობა 26 მაისის სადღესასწაულო ღონისძიებების ფინალური კონცერტები, სადაც გამოვლენ ფოლკლორული ანსამბლები და შემოქმედებითი კოლექტივები. ამასთან ხვალ, 26 მაისს ჯარს და საზოგადოებას პრემიერ-მინისტრი ირაკლი ღარიბაშვილი და თავდაცვის მინისტრი ირაკლი ალასანია მიმართავს. ხოლო პრეზიდენტი გიორგი მარგველაშვილის წვევამდელთა ფიცს ჩაიბარებს.