შეგახსენებთ, რომ საქართველოს დამოუკიდებლობის დღისადმი აღსანიშნავ ღონისძიებებში 12 ქალაქი მონაწილეობს. კულტურისა და ძეგლთა დაცვის სამინისტროს ინფორმაციით, 26 მაისი წელს განსაკუთრებულად აღინიშნება.
თბილისთან ერთად სადღესასწაულო ღონისძიებები 11 ქალაქში გაიმართება. კერძოდ, ქუთაისში, ფოთში, ზუგდიდში, ამბროლაურში, მცხეთაში, თელავში, ახალციხეში, გორში, ოზურგეთში, რუსთავში და ბათუმში.
"საქართველოს მთავრობის ადმინისტრაციის, საქართველოს კულტურისა და ძეგლთა დაცვის სამინისტროსა და თბილისის მერიის ორგანიზებით, 2014 წლის 26 მაისი დიდი სახალხო ზეიმი იქნება, სადაც თითოეულ მოქალაქეს შეეძლება მიიღოს მონაწილეობა. 12 ქალაქი ერთიანი სცენარით აღნიშნავს დამოუკიდებლობის დღეს. გადაკეტილ პროსპექტებზე არსებული კაფე-ბარები სადღესასწაულო გამოფენა-გაყიდვას მოაწყობს; თბილისში პირველი გიმნაზიის წინ "ყვავილების ზეიმის" ღონისძიება მოეწყობა, ხოლო ოპერის წინ მხატვრები განლაგდებიან; პროსპექტზე პანტომიმისა და სხვადასხვა თეატრის მსახიობები ივლიან. მოძრაობის თეატრი მცირე პერფორმანსებს დადგამს. მთავარ გამზირზე ბავშვებისთვის გასართობი ცენტრებიც მოეწყობა. რუსთაველის გამზირზე განთავსდება სამინისტროების კარვები, რომლებიც საინფორმაციო და გასართობი კუთხით იქნებიან წარმოდგენილი", _ აცხადებს კულტურის სამინისტრო.
სამინისტროს ინფორმაციით, დედაქალაქში წარმოდგენილი იქნება 2 მთავარი სცენა: პარლამენტის წინ და ევროპის მოედანზე, სადაც 12:00-21:00 საათამდე წინასწარ შედგენილი პროგრამის მიხედვით ქართველი შემსრულებლების კონცერტები გაიმართება. ამავე სცენებზე გაიმართება 26 მაისის სადღესასწაულო ღონისძიებების ფინალური კონცერტები, სადაც გამოვლენ ფოლკლორული ანსამბლები და შემოქმედებითი კოლექტივები.
ქალაქებში სადღესასწაულო ღონისძიებების ბოლოს შესრულდება ჰიმნი და იქნება ფეიერვერკები. ამასთან ხვალ, 26 მაისს ჯარს და საზოგადოებას პრემიერ-მინისტრი ირაკლი ღარიბაშვილი და თავდაცვის მინისტრი ირაკლი ალასანია მიმართავს. ხოლო პრეზიდენტი გიორგი მარგველაშვილის წვევამდელთა ფიცს ჩაიბარებს.