ლალი მოროშკინა დღეიდან იწყებს სამართლებრივ ბრძოლას სამსახურში აღდგენასთან დაკავშირებით.
იგი დღეს სახალხო დამცველს შეხვდა და შესაბამისი განცხადება დაწერა.
ლალი მოროშკინა გამოეხმაურა დიმიტრი დარბაისელის სასჯელაღსრულების დეპარტამენტის უფროსის თანამდებობიდან გადადგომის ფაქტს და ჟურნალისტებთან საუბარში განაცხადა, რომ იგი უნდა მიეცეს სისხლის სამართლებრივ პასუხისგებაში.
მისი თქმით, ცინიკური იყო ის განცხადება, რომელიც დარბაისელმა დღეს წერილობით გაავრცელა.
"თურმე, სამშობლოს სიყვარულში იღვრება და ამხელა პრემიაც იმიტომ აიღო, რომ ღამე არ ეძინა. მინდა გითხრათ, რომ ღამეები მართლა არ გვეძინა წელიწადნახევარი, არც სოზარ სუბარს, არც მის მოადგილეებს და აზრად არავის არ მოგვსვლია ამ თემით სპეკულირება. მან პირველ რიგში უნდა დააბრუნოს ის თანხები, რომელიც გატანილია" -განაცხადა მოროშკინამ.
მისივე ინფორმაციით, სხვა პირებს, რომლებიც არიან ხელისმომწერნი, ეს თანხები არ აუღიათ, არამედ ეს იყო შეკრებილი ე.წ. "ობშიაკი", რომელიც დიმიტრი დარბაისელის ჯიბეში დაილექა.
სახალხო დამცველის, უჩა ნანუაშვილის განცხადებით, აღნიშნულ საკითხთან დაკავშირებით დაგროვდა კითხვის ნიშნები, რომლებზეც პასუხი უნდა ყოფილიყო გაცემული. ეს ეხება არა მხოლოდ იმ პრემიებს, რომელზეც საზოგადოება კარგად არის ინფორმირებული, ასევე მნიშვნელოვანია ვანო მერაბიშვილთან დაკავშირებული პრობლემები და ზოგადად არაერთი საქმე, რომელიც იგივე სახალხო დამცველის წარმოებაში არსებობს და ძალიან ბევრ კითხვის ნიშნებს აჩენდა ბოლო პერიოდში სასჯელაღსრულების დაწესებულებებში არსებულ მდგომარეობასთან დაკავშირებით.
ლალი მოროშკინა სასჯელაღსრულების დეპარტამენტის უფროსის მრჩევლის თანამდებობას იკავებდა, საიდანაც ის 20 მაისს გაათავისუფლეს.