დღეს, 23 მაისს, 13.00 საათზე, საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმში (მის: თბილისი, კარგარეთელის 6) „საქართველოს ფოსტა" წერილის წერის საერთაშორისო კონკურსში გამარჯვებულებს დააჯილდოებს.
წერილის წერის საერთაშორისო კონკურსში საქართველომ წელს პირველად მიიღო მონაწილეობა. ამ ახალ ინიციატივას „საქართველოს ფოსტამ" ჩაუყარა საფუძველი.
კონკურსის მიზანია წერილის წერის მივიწყებული ტრადიციის აღდგენა და წერილობითი ურთიერთობის პოპულარიზაცია ახალგაზრდებში.
კონკურსში საქართველოს საჯარო და კერძო სკოლების 15 წლამდე ასაკის მოსწავლეებმა მიიღეს მონაწილეობა. სპეციალურად შექმნილმა ჟიურიმ, მიღებული 200 წერილიდან კონკურსში მონაწილე 4 გამარჯვებული გამოავლინა. კონკურსის თემა იყო: „რა გავლენის მოხდენა შეუძლია მუსიკას ადამიანის ცხოვრებაზე".
პირველ ადგილზე გასული საუკეთესო ნაშრომი გაიგზავნება საერთაშორისო კონკურსზე, იქ გამარჯვების შემთხვევაში ნაშრომის ავტორი გაემგზავრება შვეიცარიაში, ბერნში, „მსოფლიო საფოსტო კავშირის" შტაბ-ბინაში, სადაც 2014 წლის 9 ოქტომბერს, საერთაშორისო ფოსტის დღეს გაიმართება დაჯილდოვების ცერემონია.
წერილის წერის საერთაშორისო კონკურსს საფუძველი ჩაეყარა 1969 წელს მსოფლიო საფოსტო კავშირის ტოკიოს კონგრესზე. კონკურსი 1971 წლიდან სისტემატურად იმართება და მასში მონაწილეობას იღებს „მსოფლიო საფოსტო კავშირის" ყვველა წევრი ქვეყანა. ყოველწლიურად წერილის თემას განსაზღვრავს მსოფლიო საფოსტო კავშირი. კონკურსში მონაწილეობას იღებს მსოფლიოს 192 ქვეყანა."
