23 მაისს, ქართული ღვინის კვირეულის ფარგლებში, ესტონეთის რესპუბლიკის დედაქალაქ ტალინში, საქართველოს დამოუკიდებლობის დღისადმი მიძღვნილ საღამოზე მისულ სტუმრებს შესაძლებლობა ექნებათ დააგემოვნონ ქართული ღვინოები. ტალინში ასევე მოეწყობა ქართული ღვინის მასტერ-კლასი ძირითადი სტილების დეგუსტაციით, რომელსაც ქართული ღვინის საპატიო ელჩი და საქართველოს სომელიეთა ასოციაციის პრეზიდენტი შალვა ხეცურიანი გაუძღვება. ღონისძიებას სომელიეები, ღვინის იმპორტიორები, დისტრიბუტორები, ღვინის ექსპერტები, ჟურნალისტები, ბლოგერები და ესტონეთის სომელიეთა ასოციაციის მიერ მოწვეული სხვა საპატიო სტუმრები დაესწრებიან.

23-24 მაისს, ქართული ღვინის მასტერ-კლასი ძირითადი სტილების დეგუსტაციით აგრეთვე ლიტვის რესპუბლიკის დედაქალაქ ვილნიუსში, საერთაშორისო გამოფენის „ღვინის დღეები 2014" (Vyno Dienos) ფარგლებში გაიმართება. მასტერ კლასს ადგილობრივი სომელიეები, იმპორტიორები, დისტრიბუტორები, ღვინის ექსპერტები, ჟურნალისტები, ბლოგერები და სხვა საპატიო სტუმრები დაესწრებიან.

26-27 მაისს ქართული ღვინის კვირეულს ორი დღით ყაზახეთის რესპუბლიკა უმასპინძლებს. ასტანაში, 26 მაისს საქართველოს დამოუკიდებლობის დღისადმი მიძღვნილ მიღებაზე საელჩოს მიერ მოწვეულ სტუმრებს ქართული ღვინის მწარმოებლები საკუთარი პროდუქციის დაჭაშნიკებას შესთავაზებენ. ამავე დღეს გაიმართება ქართული ღვინის მასტერ-კლასი ძირითადი სტილების დეგუსტაციით. 27 მაისს ასტანაში, რესტორან „ბაგრატიონში", ქართული ენო-გასტრონომიული საღამო გაიმართება, სადაც მოწვეულნი არიან პოლიტიკური და ბიზნეს ელიტის წარმომადგენლები.

29 მაისს ლიტვაში, ქალაქ ტრაკაიში, დიპლომატიურ წვევულებაზე მოწვეული სტუმრებისთვის ქართული ღვინოების დაჭაშნიკება გაიმართება.

3 ივნისს, ლატვიის რესპუბლიკის დედაქალაქ რიგაში ქართული ღვინის კვირეულის ფარგლებში ბოლო ღონისძიება ჩატარდება. კერძოდ, სასტუმრო „რედისონში" გაიმართება ქართული ღვინის მასტერ-კლასი ძირითადი სტილების დეგუსტაციით.

კვირეულის მიზანია ქართული ღვინის პოპულარიზაცია და ცნობადობის ამაღლება, რათა მომხმარებელმა უშუალოდ შეიტყოს, რომ ქართული ღვინო ისეთივე მაღალი საერთაშორისო კლასისაა, როგორიც ევროპული და ახალი სამყაროს ღვინოებია.