ჯანდაცვის სამინისტრო ,,ნაცმოძრაობის" წევრსა და ჯანდაცვის ყოფილ მინისტრს ზურაბ ჭიაბერაშვილს პასუხობს და აცხადებს, რომ მიერ გავრცელებული ინფორმაცია სიმართლეს არ შეესაბამება. ,,ჯი-ეიჩ-ენი" ჯანდაცვის უწყების განცხადებას უცვლელად გთავაზობთ: ,,მოსახლეობის ჯანდაცვა არის სენსიტიური თემა, ამიტომ ნებისმიერი გადაუმოწმებელი ინფორმაცია მოიცავს რისკებს მოსახლეობისათვის. მით უმეტეს, გულსატკენია, როცა ინფორმაციის ავტორი ჯანდაცვის ყოფილი მინისტრია, რომელსაც ეს საკითხები წესით, უნდა ესმოდეს. ჯანდაცვის სამინისტრო ახორციელებს მედიკამენტების საბაზისო ფასების მონიტორინგს, გამომდინარე იქედან, რომ ეს არის მკურნალობის განუყოფელი ნაწილი. ამავე დროს ხაზს ვუსვამთ, რომ არასდროს არ ვერევით ფასწარმოქმნის პოლიტიკაში, ამას კერძო კომპანიები თავად განსაზღვრავენ. მონიტორინგის ერთ-ერთი მიზანია, ჯანდაცვის პრიორიტეტების პერიოდული გადაფასება და პაციენტების მხარდაჭერა სახელმწიფო პროგრამებით. რაც შეეხება ზურაბ ჭიაბერაშვილის მიერ ავერსის აფთიაქში (ლეონიძის ქ. #1) შეძენილი მედიკამენტების ფასებსა და დინამიკას, ვწუხვართ, რომ მოსახლეობას არასწორი ინფორმაცია მიაწოდა და რეალური სურათი საპირისპიროა. ამ მედიკამენტების უმრავლესობის ფასები შემცირებულია 2012 წლის 1 ოქტომბერთან შედარებით", _აღნიშნულია განცხადებაში.
შეგახსენებთ, რომ ,,ნაცმოძრაობა" მედიკამენტების ფასების მატებაზე საუბრობს. როგორც პარტიის წევრმა ზურაბ ჭიაბერაშვილმა განაცხადა ხელისუფლების გაუაზრებელმა ეკონომიკურმა პოლიტიკამ გამოიწვია ლარის გაუფასურება და ფასების ზრდა, რისი ნათელი მაგალითიცაა მედიკამენტების ღირებულების მატება.იგი თბილისის ერთ-ერთ აფთიაქსაც ესტუმრა, სადაც თავად შეიძინა ყველა ის წამალი, რომელსაც მოსახლეობა ყველაზე აქტიურად მოიხმარს. მისივე განმარტებით, 2012 წელთან შედარებით 2014 წელს წამლის ფასი საგრძნობლად გაიზარდა.