რადიო "არ დაიდარდო" 10 წლის იუბილეს აღნიშნავს. საზეიმო მიღება კრწანისის რეზიდენციაში 22 მაისს 18.00 საათზე გაიმართება. საიუბილეო ღონისძიებაში ქართული ესტრადის და ხალხური შემოქმედების ცნობილი სახეები, მათ შორის "შვიდკაცა", "მგზავრები", ჯგუფი "ბანი", კვარტეტი "ალილო", თეატრალური კვარტეტი, ჯგუფი "ეგარი", ანსამბლი "ურმული, ""კახაბერი და ხანუმები", ქართული ნაციონალური ბალეტი "სუხიშვილები" და ანსამბლი "მეტეხი" მიიღებენ მონაწილეობას. იუბილეს ფარგლებში დაგეგმილია მხატვარ-მეთოჯინე თეა გუნთაიშვილის ხელნაკეთი თოჯინების გამოფენა, სადაც წარმოდგენილი იქნება საქართველოს ყველა კუთხის ტრადიციული სამოსი.
მიწვეულ სტუმრებს შესაძლებლობა ექნებათ ჩაერთონ საქველმოქმედო გამოფენა-გაყიდვაში, დაათვალიერონ და შეიძინონ ბავშვების ხელნაკეთობები და ნამუშევრები. აქცია მიუსაფარ ბავშვთა ცენტრებისა და შეზღუდული შესაძლებლობების მქონე პირთა სარეაბილიტაციო დაწესებულებების მონაწილეობით იმართება.
რადიო "არ დაიდარდო" პირველად ეთერში 2004 წლის 1 ივნისს გავიდა. "არ დაიდარდო" ემყარება ქართული კულტურის მთავარ ფასეულობებს, ტრადიციებს, ეროვნული ხასიათის თავისებურებებს. რადიოსადგურის ფორმატი ძირითადად თანამედროვე პოპულარული ქართული ესტრადის და საუკეთესო რეტრო ჰიტებს მოიცავს.
"არ დაიდარდოს" მაუწყებლობა მთელ საქართველოზე ვრცელდება. მისი სიხშირეები FM დიაპაზონზე შემდეგია: თბილისი- FM 97.7, აჭარა, გურია (ბათუმი, ოზურგეთი)- FM 105.7, ქართლი (გორი) - FM 98.3, დმანისი - FM103.0, სამცხე-ჯავახეთი (ახალციხე) - FM 105.7, იმერეთი (ქუთაისი) - FM 102.7, სამეგრელო (ზუგდიდი) - FM 107.7.
რადიო ჰოლდინგი "ფორტუნა" უმსხვილესი სამაუწყებლო კომპანიაა, რომელიც ოთხ ყველაზე პოპულარულ მუსიკალურ და საინფორმციო რადიოსადგურებს ფლობს "ფორტუნა", "ფორტუნა პლუსი", "არ დაიდარდო" და "ავტორადიო".