ბათუმში სამაცივრე და სასაწყობო მეურნეობის მშენებლობა იგეგმება. ამ მიზნით მთავრობამ ინვესტორის მოძეიბა უკვე დაიწყო და შესაბამისი აუქციონი გამოაცხადა. აუქციონზე ნონეშვილის ქუჩაზე ბათოილის მიმდებარედ 3142,4 კვ.მ შენობა-ნაგებობა და მასზე მიმაგრებული 6582 კვ.მ არასასოფლო-სამეურნეო დანიშნულების მიწის ნაკვეთია გამოტანილი და მისი საწყისი ღირებულება 1 მლნ 60 ათასი ლარია. აუქციონი კი 23 მაისისთვისაა ჩანიშნული.
აუქციონის პირობების მიხედვით, ობიექტის მფლობელი ვალდებულია, ხელშეკრულების გაფორმებიდან 12 თვის ვადაში საკუთრებაში გადაცემულ მიწის ნაკვეთზე სამაცივრე და სასაწყობო მეურნეობა მოაწყოს, რისთვისაც არანაკლებ 1,5 მლნ აშშ. დოლარის ინვესტიცია განახორციელოს.
აუქციონის პირობებში დევს ასევე ისიც, რომ ობიექტის ამოქმედებიდან 1 თვის ვადაში, ინვესტორი ვალდებულია ობიექტზე საქართველოს არანაკლებ 30 მოქალაქე დაასაქმოს და მომდევნო 2 წლის განმავლობაში დასაქმებულთა რაოდენობაც შეინარჩუნოს.
