ყინწვისის კომპლექსის სამონასტრო ინფრასტრუქტურის მოწესრიგებისა და ტაძრის ტერიტორიის განვითარების მიზნით მზადდება საპროექტო დოკუმენტაცია.
ყინწვისის სამონასტრო კომპლექსი XII-XIII სს. მიჯნას განეკუთვნება. მასში შემავალ ნაგებობათაგან დომინანტი წმ. ნიკოლოზის სახელობის ეკლესიაა, რომლის ფრესკებიც ქართული შუა საუკუნეების კედლის მხატვრობის ერთ-ერთი უმნიშვნელოვანესი ნიმუშთაგანია. იგი შესრულდა თამარ მეფის პირველი ვეზირის - ანტონ გლონისთავისძის დაკვეთით და ჩრდილოეთის კედელზე გამოსახულნი არიან თავად მეფე თამარი, გიორგი III და ლაშა-გიორგი.
ამავე პერიოდისაა წმ. ნიკოლოზის ჩრდილო-დასავლეთით, ცალკე მდგომი ღვთისმშობლის სახელობის დარბაზული ეკლესიის ნანგრევი, რომლის მცირედ შემორჩენილ ფრესკებს დროებითი გადახურვა იცავს.
წმ. ნიკოლოზის მინაშენები სამხრეთით და ჩრდილოეთით XIVს-შია გამართული, ამ დროის უნდა იყოს დასავლეთ კედელთან მდგომი წმ. გიორგის პატარა ტაძარიც.
გალავნით შემოზღუდულ კომპლექსში შემავალი კარიბჭე - ორსართულიანი სამრეკლოს პირველი სართული, აღდგენილი და რეაბილიტირებულია 2011 წელს.
