პრორუსი სეპარატისტები, რომლებიც ამჟამად დონბასში იბრძვიან იმ იარაღს იყენებენ, რომელიც რუსეთმა 2008 წელს საქართველოსთან მომხდარი ომის შემდეგ ხელში ჩაიგდო. განცხადება ამის შესახებ უკრაინულ მედიასთან საუბარში პოლონელმა სამხედრო ექსპერტმა თადეუშ ვრუბელმა გააკეთა, უკრაინელი ძალოვნების მიერ ნაჩვენები ვიდეორგოლის კომენტირებისას, რომელზეც ჩანს, რომ საზენიტო კომპლექსი რომელიც ტერორისტებს აქვთ ხელთ პოლონური წარმოებისაა.
„შესაძლოა ეს ის იარაღია, რომელიც პოლონეთმა ოფიციალურად მიჰყიდა საქართველოს და რომელიც რუსეთს ჩაუვარდა ხელში 2008 წელს",- განაცხადა ექსპერტმა და გაიხსენა ისიც, რომ რუსული არმიის წარმომადგენლები იკვეხნიდნენ კიდეც იმით, რომ მათ ეს იარაღი ხელში ჩაუვარდათ.
ვრუბელი ასევე აცხადებს, რომ ის, რომ დონეცკელი სეპარატისტები, საქართველოში ხელში ჩაგდებული იარაღით იბრძვიან "შემთხვევითი როდია".
„ეს ცხადი რუსული პროვოკაციაა და მორიგი დასტური იმისა, რომ იარაღი სეპარატისტებისათვის რუსეთიდან შედის. რუსულმა არმიამ რამდენიმე ტიპის ასეთი იარაღი საქართველოსთან ომის შემდეგ ჩაიგდო ხელში. ეს იყო ერთადერთი საშუალება იმისა, რომ ეს იარაღი რუსეთის ხელში აღმოჩენილიყო",_ აცხადებს ექსპერტი.
