თბილისის მერობის კანდიდატი ნიკა მელია დღეს, ვაჟა-ფშაველას გამზირზე მდებარე შეღავათიანი მგზავრობის ბარათების სერვის-ცენტში ვეტერანებს შეხვდა და იმ სიახლეზე ესაუბრა, რომლის ფარგლებში, დღეიდან თბილისში მოძრავ მიკროავტობუსებში ომის ვეტერანები და მათთან გათანაბრებული პირები მგზავრობის ღირებულების მხოლოდ ნახევარს გადაიხდიან.
ნიკა მელიას თქმით, ვეტერანებისთვის შეღავათის დაწესება მნიშვნელოვანია და ზოგადად საზოგადოებრივ ტრანსპორტში სხვადასხვა ახალი შეღავათის შემოღება აუცილებელია. მუნიციპალურ ტრანსპორტში ახალი საშეღავათო სისტემის ამოქმედებას თბილისის მერობის კანდიდატი მოსახლეობას მისი მერად არჩევის შემთხვევაში ჰპირდება. ნიკა მელიას ინიციატივის ფარგლებში, მეტროსა და ავტობუსში სოციალურად დაუცველი მოსახლეობა, სტუდენტები, პენსიონერები და პედაგოგები უფასოდ იმგზავრებენ, ხოლო ყველა სხვა კატეგორიის თბილისელები 50 თეთრის ნაცვლად, 20 თეთრს გადაიხდიან.
