ბოლო დროს ფართო საზოგადოების ლეგიტიმურ ინტერესს იწვევს მთავრობის წევრთა, თანამდებობის პირთა და სხვა საჯარო მოხელეთა ხელფასებისა და პრემიების საკითხი. იმისათვის, რომ საზოგადოების ყველა კითხვას გაეცეს პასუხი და მოიხსნას ყოველგვარი გაუგებრობა ამ საკითხთან დაკავშირებით, პრემიერ-მინისტრმა საქართველოს მთავრობის ადმინისტრაციას და საჯარო სამსახურის ეროვნულ ბიუროს დაავალა, შეიმუშაონ თანამდებობრივი სარგოებისა და პრემირების ერთიანი წესი, რომელიც გავრცელდება ყველა თანამდებობის პირსა და საჯარო მოხელეზე.
„ერთხელ და სამუდამოდ ჩვენს ქვეყანაში უნდა შეიქმნას სისტემა, როემლიც მოაწესრიგებს საჯარო მოხელეების და თანამდებობის პირების ხელფასების და დანამატების თუ პრემიების საკითხს. ეს უნდა იყოს გამჭვირვალე სისტემა, რომ ჩვენი ქვეყნის არცერთ მოქალაქეს არ დარჩეს პასუხგაუცემელი კითხვა. სისტემა უნდა იყოს სტანდარტიზებული, თუმცა ითვლისწინებდეს განსაკუთრებით მძიმე და დიდ რისკთან დაკავშირებული საქმიანობის სპეციფიურობას. ვიცი, რომ ამ საკითხზე უკვე დაწყებულია მუშაობა და პირველი ეტაპი უკვე წარმატებითაა გავლილი. ამიტომ, უმოკლეს ვადებში უნდა დავასრულოთ ეს პროცესი" - აცხადებს ირაკლი ღარიბაშვილი.
პრემიერ-მინისტრის დავალებით მთავრობის ადმისნიტრაციის უფროსმა მაია ცქიტიშვილმა, მისმა მოადგილემ ნინო კობახიძემ და საჯარო სამსახურის ბიუროს ხელმძღვანელმა ეკატერინე ქარდავამ არაუგვიანეს 31 ივნისისა უნდა წარმოადგინონ ხელფასებისა და თანამდებობრივი სარგოების მოქნილი, სამართლიანი განაწილების პრინციპზე დაფუძნებული და ევროპულ სტნდარტებთან შესაბამისობაში მოყვანილი სტრუქტურა.
