დარიალის ხეობაში სტიქიის გამომწვევი მიზეზი მყინვარის ინტენსიური მოძრაობაა.
აღნიშნულთან დაკავშირებით, ინფორმაციას ინფრასტრუქტურის სამინისტრო ავრცელებს.
განცხადების თანახმად, სტიქიის გამომწვევ მიზეზად ექსპერტები გარე ფაქტორებს არ მიიჩნევენ. სპეციალისტების შეფასებით, ტრაგედია 5047 მეტრის სიმაღლის მწვერვალის - მყინვარწვერის ჩრდილო-აღმოსავლეთ კალთაზე განლაგებული დევდორაკის მყინვარის ინტენსიური მოძრაობის შედეგია.
ეკოლოგიური კატასტროფის შედეგად, მიწის უზარმაზარი მასა ჩამოიშალა, რასაც მდინარე თერგისა და სამხედრო გზის ჩაკეტვა მოჰყვა. მყინვარის ფენების მოძრაობის შედეგად, ეკოლოგიური კატასტროფა მოხდა 2002 და 2007 წლებშიც.
რაც შეეხება დარიალის ხეობაში ჰესის მშენებლობასა და კატასტროფასთან მის კავშირს, სპეციალისტთა შეფასებით, ეს ორი ზონა გეოლოგიურად სრულიად განსხვავებული ადგილებია. ჰესის მშენებლობის ადგილი 4 კმ-ით არის დაშორებული სტიქიის ზონას და აღნიშნულ მშენებლობას კავშირი არ აქვს კატასტროფასთან", - აცხადებს ინფრასტრუქტურის სამინისტრო.
დღეს უნდა გახდეს ცნობილი დარიალის ხეობაში მომუშავე გეოლოგების დასკვნაც, რომლებიც ხეობასა და მყინვართან არსებულ ვითარებას უკვე ორი დღეა სწავლობენ.