პრემიერ-მინისტრი ირაკლი ღარიბაშვილი სახელმწიფო პროგრამის - "აწარმოე საქართველოში" პრეზენტაციას გამართავს.
აღნიშნული ღონისძიება ირაკლი ღარიბაშვილმა დღეს ზუგდიდში გამართულ წინასაარჩევნო შეხვედრაზე დააანონსა.
"სწორედ აქ, სამეგრელოში დღეს მინდა დავაანონსო ის პროგრამა, რომლის პრეზენტაციაც თბილისში გაიმართება. ჩემი ინიციატივით იწყება სახელმწიფო პროგრამა - "აწარმოე საქართველოში". ეს გულისხმობს ყველა რეგიონში, შემდეგ ყველა რაიონსა და ბოლოს ყველა სოფელში ტრადიციული ქართული წარმოების აღდგენას და აღორძინებას. ჩვენ უნდა ვაწარმოოთ ისეთი პროდუქცია, რომლის შემოტანის აუცილებლობაც არ გვაქვს. ეს, რა თქმა უნდა, გააჩენს სამუშაო ადგილებს და ხალხი დასაქმდება. ჩვენ გვექნება უმაღლესი ხარისხის ქართული პროდუქცია, რომელიც კონკურენციას გაუწევს უცხოურს და ყველასთვის საამაყო იქნება. ეს არის ჩემი ოცნება და ჩვენ ამას შევძლებთ", - განაცხადა პრემიერ-მინისტრმა.
