ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრმა დავით დარახველიძის განცხადებით, აფხაზეთიდან 13 გმირი მეომრის ცხედარი თბილისშია გადმოსვენებული.
როგორც მინისტრმა ჟურნალისტებს განუცხადა, დასრულდა 1993 წლის 22 სექტემბერს ქართული თვითმფრინავის ჩამოგდების შედეგად სოხუმის ბაბუშერას აეროპორტში დაღუპული თანამემამულეების ცხედრების გადმოსვენება.
მისივე თქმით, ცხედრების ანთროპოლოგიური ანალიზისთვის მასალები უახლოეს მომავალში გაიგზავნება ზაგრების ექსპერტიზის ბიუროში, ხოლო ოჯახის წევრების დე-ენ-ემ-ის ანალიზს სამხარაულის ეროვნული ბიურო ჩაატარებს. მონაცემების შედარების შემდეგ კი მოხდება ცხედრების იდენტფიცირება და შემდეგ ცხედრები გადაეცემა ოჯახებს.
პროცესი, სავარაუდოდ, რამდენიმე თვეში განხორციელდება. პროცესის მიმდინარეობას კი პრემიერ-მინისტრი ირაკლი ღარიბაშვილი აკონტროლებს.
მინისტრმა მადლობა გადაუხადა საერთაშორისო წითელი ჯვრის კომიტეტს, რომლის მეშვეობითაც განხორციელდა საქართველოში ცხედრების გადმოსვენება.
დარახველიძემ ჟურნალისტებთან საუბრისას აღნიშნა, რომ ბაბუშერას აეროპორტში დაახლოებით 50-ზე მეტი ცხედარი იყო დასაფლავებული. 2006 წლის შემდეგ აფხაზეთიდან ცხედრების გადმოსვენების პროცესი გაყინული იყო. შარშან, ახალი ხელისუფლების პერიოდში მოხდა მხოლოდ 2 ცხედრის გადმოსვენება. აფხაზეთში სულ უგზო-უკვლოდ დაკარგულად 2000-მდე ქართველი ითვლება.