თუ სასამართლო გადაწყვეტს, რომ მთავრობის ადმინისტრაციაში გამართული შეხვედრა, რომელსაც მთავრობის წევრებთან ერთად, პოლიტსაბჭოს წარმომადგენლებიც ესწრებოდნენ, ადმინისტრაციული დარღვევა იყო, ჩვენ, ბუნებრივია, ამ გადაწყვეტილებას დავემორჩილებით, - ამის შესახებ მთავრობის ადმინისტრაციის იურიდიული დეპარტამენტის უფროსმა შალვა თადუმაძემ თემის კომენტირებისას განაცხადა.
„იმდენად პრინციპულია საქართველოს პრემიერ-მინისტრის პოზიცია, რომ ადგილობრივი თვითმმართველობის არჩევნები ჩატარდეს სამართლიან და დემოკრატიულ გარემოში და არ დარჩეს არანაირი მცირედი კითხვაც კი, ბუნებრივია, ადმინისტრაცია დაემორჩილება სასამართლოს გადაწყვეტილებას", - განაცხადა შალვა თადუმაძემ.
ცენტრალურმა საარჩევნო კომისიამ ადმინისტრაციულ სამართალდარღვევათა ოქმი არასაპარლამენტო ოპოზიციის საჩივრის საფუძველზე შეადგინა და სასამართლოს გადაუგზავნა. „არასაპარლამენტო ოპოზიცია" მთავრობის ადმინისტრაციის შენობაში ჩატარებულ სამუშაო შეხვედრას ადმინისტრაციულ დარღვევად მიიჩნევს.