იუსტიციის სამინისტროსა და საქველმოქმედო ჰუმანიტარულ ცენტრ "აფხაზეთს" შორის გაფორმებული ხელშეკრულების საფუძველზე ყოფილ მსჯავრდებულთა ბიზნესსაქმიანობის წამოწყება და გაფართოვება ივნისიდან დაიწყება. პროექტის - "ყოფილ მსჯავრდებულთა ბიზნესინიციატივათა მხარდაჭერა" 3 ეტაპი უკვე დასრულდა. ბოლო, მეოთხე ატაპზე კი ყოფილი მსჯავრდებულები ყველა იმ აღჭურვილობას მიიღებენ, რაც მათი ბიზნესისთვის აუცილებელია.
როგორც ცენტრი "აფხაზეთის" პროექტის მენეჯერი დავით გუჩუა აცხადებს, კომისიამ ყოფილ მსჯავრდებულთა მხრიდან 32 ბიზნესწინადადება მიიღო, საბოლოოდ კი 5 გამარჯვებული პროექტი გამოვლინდა: "საგრანტო კომიტეტმა 5 ბენეფიციარი შეარჩია. მაგალითად, ერთ-ერთი გახლავთ ყოფილი პოლიტპატიმარი, რომლის ბიზნესი თეთრიწყაროს რაიონში ფერმერული მეურნეობის განვითარებას უკავშირდება. ის დაფინანსდება 4 000 ლარით, რასაც დაემატება მისივე თანამონაწილეობა 3 000 ლარის ოდენობით. ასევე, ერთ-ერთი გამარჯვებული პროექტი სამედიცინო მომსახურებას უკავშირდება. კერძოდ, თბილისის პირველი კლინიკური საავარმყოფოს ტერიტორიაზე ხერხემლის დაავადების მკურნალობისა და რეაბილიტაიის კაბინეტის გახსნას. ასევე, ერთ-ერთი პროექტი, ფეხსაცმლის სახელოსნოს გახსნას უკავშირდება."
ბენეფიციართა შესარჩევი კონკურსი რამდენიმე ეტაპს მოიცავდა: მონაწილეთა განაცხადების შეფასება; ბიზნეს ტრენინგები; წარმოდგენილი ბიზნეს გეგმის შეფასება; საველე ვიზიტები და კომიტეტის საბოლოო შეფასება. დავით გუჩუას თქმით, განხილვის დროს მნიშბნელოვანი იყო ბიზნესის მდგრადობა.
მაისის ბოლოდან ყველა იმ ინვენტარის შეძენა დაიწყება, რაც გამარჯვებული პროექტიბისთვის არის საჭირო. შემდეგ კი ბენეფიციარები აღიჭურვებიან. გრანტის მაქსიმალური ოდენობა 4 000 ლარს შეადგენს.
"ყოფილ მსჯავრდებულთა ბიზნესინიციატივების მხარდაჭერის" პროექტთან დაკავშირებით იუსტიციის მინისტრ თეა წულუკიანსა და და საქველმოქმედო ჰუმანიტარულ ცენტრ "აფხაზეთის" აღმასრულებელ დირექტორ ეკა გვალიას შორის საგრანტო ხელშეკრულება 2013 წლის 9 დეკემბერს გაფორმდა.
მასალის გამოყენების პირობები