როგორც გოცირიძე განმარტავს, მალე სოფლის მეურნეობის პროექტების მართვის სააგენტო გასაყიდად რამდენიმე ობიექტს გამოიტანს. ეკონომიკური განვითარების ცენტრის თავმჯდომარე ამბობს, რომ მომავალში კიდევ იგეგმება რამდენიმე სასოფლო-სამეურნეო საწარმოს გასხვისება. საწარმოები ელექტრონულ აუქციონზე გაიყიდება. თავდაპირველად გასაყიდად 10 საწარმოს გამოიტანენ.

„მისასალმებელია ის ფაქტი, რომ მთავრობა სახელმწიფო აგროსაწარმოებს ყიდის. არა და ესენი სულ რაღაც 3-4 წლის წინათ ამუშავდა.( სათბურები, მარცვლეულის შესანახი ცენტრები, საჩითილე მეურნეობები, პომიდვრის მეურნეობა და სხვა). მალე სახელმწიფო ღვინის ქარხნებსაც გაყიდიან. არა და, მართლაც სასაცილოა, ქვეყანამ ყველაფერი გაყიდა ნავსადგურებიდან დაწყებული ენერგეტიკის ობიექტებით დამთავრებული პარალელურად ახალი სახელმწიფო ღვინის ქარხნები და პომიდვრის მეურნეობები ააშენა.
დღეისათვის არსებოს 71 სოფლის მეურნეობის პროფილის სახელმწიფო საწარმო. აქედან მუშაობს მხოლოდ 15. ყველა წამგებიანია.
მხოლოდ ასე ზარზეიმით შემოტანილი ტრაქტორები 300 მილიონი ლარი დაჯდა. 1069 ტრაქტორი, 81 კომბაინი, 5 ათასამდე მონობლოკი და მისაბმელი საშუალებები. ესენი განაწილებულია საქართველოს 12 რაიონში. ჯერ მისი გაყიდვა ვერ გადაუწყვეტიათ უამრავი სირთულის გამო, მაგრამ რომ გაიყიდება, ეჭვი მთავრობაში არავის ეპარება.
ეს ნაცნობი სურათია საბჭოთა სინამდვილიდან. ცოტაც და ამათგან არაფერ დარჩება. ტრაქტორებიც გაჩერდება, ტექნიკაც მიმოიფანტება. თავის დროზე იმ ფულით, რაც ამ დარგში ჩაიყარა ,15-20 წლიანი იაფი სესხები რომ მიეცათ ფერმერებისთვის და სხვა მსურველთათვის თუნდაც იგივე ტრაქტორების შესაძენად, დღეს მოვლილი და მზრუნველ ხელში მყოფი სატრაქტორე კერძო ფირმები გვექნებოდა. ახლა კი ასეულობით მილიონიანი ქონება მის მეათედად თუ გაიყიდება, ისიც კარგი საქმე იქნება. ასე იცის, როცა მთავრობა პომიდვრის მოყვანას დაიწყებს და თხების მოშენებას.
თუ ეს მთავრობა წინა მთავრობის შეცდომებს ასწორებს, თვითონაც ნუ დაავიწყდება, რომ ზუსტად ამ დღეში აღმოჩნდება, თუ ე.წ. სახელმწიფო განვითარების ბანკზე და მის მიერ დაფინანსებული პროექტებზე ხელი არ აიღო. რამდენიმე წელიწადში მათაც ისეთივე ბედი ეწევათ, რაც ამ აგროსაწარმოებს"- აცხადებს გოცირიძე.