16 მაისს, საქართველოს შემოსავლების სამსახურის უფროსმა ირაკლი გვარამაძემ და საქართველოში ვიზიტად მყოფმა ბელარუსის რესპუბლიკის გადასახადებისა და მოსაკრებლების მინისტრმა ვლადიმერ პოლუიანმა ხელი მოაწერეს „საქართველოს მთავრობასა და ბელარუსის რესპუბლიკის მთავრობას შორის საგადასახადო საკითხებში ინფორმაციის გაცვლის შესახებ" შეთანხმებას.
შეთანხმება პირველი ოფიციალური დოკუმენტია, რომლითაც საფუძველი ეყრება საქართველოსა და ბელარუსის რესპუბლიკის საგადასახადო ადმინისტრაციებს შორის თანამშრომლობას. მისი მიზანია საქართველოსა და ბელარუსის რესპუბლიკის საგადასახადო ადმინისტრაციებს შორის ურთიერთობის განვითარება, საგადასახადო შინაარსის შემცველი ინფორმაციის გაცვლა, საგადასახადო დარღვევების ერთობლივი ძალისხმევით აღკვეთა, დახმარება საგადასახადო კანონმდებლობის სრულყოფაში.
სამუშაო ვიზიტის ფარგლებში, ბელარუსის რესპუბლიკის გადასახადებისა და მოსაკრებლების მინისტრი ესტუმრა შემოსავლების სამსახურის ვაკე-საბურთალოს რაიონის სერვისცენტრს და ადგილზე გაეცნო სისტემაში დანერგილ ტექნოლოგიურ და პროცედურულ სიახლეებს.
ვლადიმერ პოლუიანი სამუშაო ვიზიტად თბილისს 15 მაისს ეწვია.
