„ერთიანი ნაციონალური მოძრაობის" გამგებლობის კანდიდატმა ჩოხატაურის რაიონში გურამ ჩალაგაშვილმა დღეს ვანის, ზომლეთის, შუაამაღლების, სამების და გოგოლესუბნის ამომრჩევლებთან მორიგი შეხვედრა გამართა.
აღნიშნულ სოფლებში გამართული შეხვედრისას ჩალაგაშვილმა მოსახლეობას რაიონში განსახორციელებელი პროექტები გააცნო და აღნიშნა, რომ მისი არჩევის შემთხვევაში მაქსიმალურად იქნება რეალიზებული ჩოხატაურში არსებული პოტენციალი.
„დღეს სოფლის მოსახლეობას აღარავინ ეკითხება, თუ რისი გაკეთება სურთ სოფლის პროექტით. მოსახლეობა ვერ ახერხებს მიწების დამუშავებას და დათესვას. კრიმინალი პიკს აღწევს. გუშინ თვით პოლიციის თანამშრომელი გადმოიყვანეს პოლიციის მანქანიდან და სასტიკად გაუსწორდნენ. რაიონში ერთხელ და სამუდამოდ უნდა დამყარდეს წესრიგი და მშრომელ ადამიანებს მიეცეთ ნორმალური ცხოვრებისა და განვითარების საშუალება", - აცხადებს ჩალაგაშვილი.
ჩალაგაშვილმა ასევე განაცხადა, რომ მისი პრიორიტეტი იქნება დასაქმება და განსაკუთრებული ყურადღება დაეთმობა ადგილზე ახალგაზრდების დამაგრებას, რისთვისაც იგეგმება მცირე საწარმოების გახსნის ხელშეწყობა.
ასევე აღინიშნა, რომ მაქსიმალურად იქნება გამოყენებული რაიონის საკურორტო პოტენციალი, კერძოდ ბახმაროს განვითარება, რომელიც ბოლო წელიწადნახევარია შეჩერებულია.
„ამ მიმართულებას განსაკუთრებული ყურადღება დაეთმობა. ტურიზმის განვითარება, შესაბამისი ინფრასტრუქტურის უზრუნველყოფა ასობით ადამიანს მისცემს შესაძლებლობას გაუჩნდეს ახალი შემოსავლის წყარო", - განაცხადა ცალაგაშვილმა.
გამგებლობის კანდიდატმა ყურადღება გაამახვილა კონკრეტულ პრობლემებზე, რომლებიც ყველაზე მეტად აწუხებს დღეს მოსახლეობას. ეს არის გამრიცხველიანება, ბუნებრივი გაზი და სასმელი წყალი. პრაქტიკულად წელიწადნახევარია, რაც არც ერთ სოფელში აღარ შესულა ბუნებრივი აირი. დაბაში, ორი წლის წინ გაყვანილ წყლის მილებში, დღემდე ვერ მოხერხდა სასმელი წყლის შეშვება. სოფლის მოსახლეობის უმრავლესობას არ აქვს სასმელი წყალი. სავალალო მდგომარეობაა სავალ გზებზე. გაჩერებულია თითქმის ყველა მცირე საწარმო.
გურამ ჩალაგაშვილი მოსახლეობასთან შეხვედრებს აგრძელებს.
