13 მაისს, საფრანგეთის პრეზიდენტის ფრანსუა ოლანდის ვიზიტის და ბიზნესფორუმის ფარგლებში, საქართველოს ფინანსთა მინისტრმა ნოდარ ხადურმა და საფრანგეთის საგარეო ვაჭრობის, ტურიზმის ხელშეწყობისა და დიასპორის საკითხებში სახელმწოფო მდივანმა, ფლორ პელერენმა (FLEUR PELLERIN) ხელი მოაწერეს „საქართველოს მთავრობასა და საფრანგეთის მთავრობას შორის საქართველოში საფრანგეთის განვითარების სააგენტოსა (AFD) და ეკონომიკური თანამშრომლობის ხელშეწყობისა და განვითარების საზოგადოების (PROPARCO) დაფუძნებისა და საქმიანობის შესახებ" შეთანხმებას.
PROPARCO AFD-ს დამხმარე ორგანიზაციაა და აფინანსებს პროექტებს კერძო სექტორში. ორივე ორგანიზაცია შედის AFD ჯგუფში, რომელიც ახორციელებს საფრანგეთის სახელმწიფოს ოფიციალურ მხარდაჭერას დაახლოებით 80 ქვეყანაში და გააჩნია დაახლოებით 60 ადგილობრივი წარმომადგენლობითი ოფისი. შეთანხმების მიზანია, AFD ჯგუფის საქმიანობის ხელშეწყობა საქართველოს ტერიტორიაზე.
აღნიშნული შეთანხმების ხელმოწერის შემდეგ იგეგმება AFD ჯგუფის მიერ თბილისში წარმომადგენლობითი ოფისის დაარსება, რომელიც საქართველოს გარდა რეგიონის სხვა ქვეყნებსაც მოემსახურება.
დღესვე საფრანგეთის რესპუბლიკის მთავრობასა და საქართველოს მთავრობას შორის ხელი მოეწერა „ფინანსურ პროტოკოლს", რომელიც ეხება ქალაქ ჭიათურაში საბაგიროების განახლებას. პროექტის განხორციელების მიზნით საფრანგეთი გამოყოფს 13,200,000 ევროს შეღავათიანი სესხის სახით.
პროექტის განხორციელების მიზნით ხელშეკრულება ახლო მომავალში გაფორმდება საქართველოს მთავრობას, წარმოდგენილი საქართველოს რეგიონული განვითარებისა და ინფრასტრუქტურის სამინისტროთი და ფრანგულ კომპანია "POMAGALSKI"-ის შორის.
