პრემიერ-მინისტრი ირაკლი ღარიბაშვილი ციხე-ქალაქ მუცოში არსებულ ვითარებას ეხმიანება. როგორც საკითხს კომენტირებისას პრემიერმა განმარტა წლების განმავლობაში ვერ მოხერხდა შესაბამისი თანხების გამოყოფა და ასეთი მნიშვნელობის ძეგლის დაცვა. ღარიბაშვილის თქმით, ახალი ხელისუფლება ყველაფერს გააკეთებს იმისთვის, რომ მუცოს ძეგლის სრული რეაბილიტაცია მოხდეს.
,,ციხე-ქალაქი მუცო, უნიკალური არქიტექტურული და კულტურული მემკვიდრეობის ძეგლი, განადგურების პირასაა. მიუხედავად იმისა, რომ მუცო საქართველოს ყველაზე მძიმე მდგომარეობაში მყოფ ისტორიულ ძეგლთა სიაში იყო შესული, სამწუხაროდ, წლების განმავლობაში ვერ მოხერხდა შესაბამისი თანხების გამოყოფა და ასეთი მნიშვნელობის ძეგლის დაცვა.ჩვენ სასწრაფოდ მივიღებთ გადამჭრელ ზომებს და არ დავუშვებთ, საფრთხე დაემუქროს ხევსურეთის და საქართველოს დარაჯად წოდებულ შუა საუკუნეების ამ უძველეს და ისტორიულ ძეგლს.კულტურული მემეკვიდრეობის გადარჩენა და მომავალი თაობებისთვის შენარჩუნება ყველა პასუხისმგებლობის მქონე ხელისუფლების ვალია. ამიტომ, მივიღე გადაწყვეტილება, უახლოეს დღეებში პირადად ჩავიდე პირიქითა ხევსურეთში და ადგილზე გავეცნო ყველა პრობლემას. ჩვენ ყველა ღონეს ვიხმართ, რომ მუცოს - ამ უნიკალური ძეგლის სრული რეაბილიტაცია-რესტავრაცია მოხდეს", _განაცხადა ღარიბაშვილმა.
