ეკონომიკის განვითარების ცენტრის ხელმძღვანელი, ეროვნული ბანკის ყოფილი პრეზიდენტი რომან გოცირიძე "ჯი-ეიჩ-ენთან" საარჩევნო პროცესის მიმდინარეობაზე საუბრობს და აცხადებს, რომ სანამ მოქმედებს შიშის ფაქტორი, სანამ სახელისუფლო ძალების ღია თუ ფარული დაფინანსება არის წახალისებადი, ოპოზიციის კი დასჯადი, არჩევნები ვერ იქნება თავისუფალი და სამართლიანი.
"როცა მეწარმეები ერიდებიან კანონით მინიჭებული უფლების ფარგლებში საარჩევნოდ გაწეული ხარჯების ლეგალიზებას, როცა ეშინიათ რეპრესიების ხელისუფლების მხრიდან , როცა ასეთი ხარჯები არის გაუმჭვირვალე, ეს ნიშნავს იმას, რომ არსებობს ბიზნესზე პოლიტიკური წნეხი. ეს უკვე საარჩევნო პროცესის არადემოკრატიულობის მაჩვენებელიცაა. სანამ მოქმედებს შიშის ფაქტორი, სანამ სახელისუფლო ძალების ღია თუ ფარული დაფინანსება არის წახალისებადი, ოპოზიციის კი დასჯადი, არჩევნები ვერ იქნება თავისუფალი და სამართლიანი", - აცხადებს "ჯი-ეიჩ-ენთან" საუბარში გოცირიძე და ერთ მაგალითი მოჰყავს. " საპრეზიდენტო არჩევნების შემდეგ, პრესაში კანდიდატების ფინანსური ანგარიშები გამოქვეყნდა. ერთ-ერთის სიაში თვალი მოვკარი ნაცნობი პიროვნების გვარს, რომელსაც თურმე 40 ათასი ლარი შეუტანია საარჩევნო კამპანიის დასაფინანსებლად ერთ-ერთი არასახელისუფლო, ასე თუ ისე რეიტინგული კანდიდატის დასაფინანსებლად. იგი გაქცეული იყო საქართველოდან ვარდების რევოლუციის შემდეგ და ცხრა წელი იმალებოდა რუსეთში. ახლობელთან შევხვდი შემთხვევით, ახალი ჩამოსული იყო ამნისტიის შემდეგ. მოგვყვა, თუ როგორ გაატარა ეს წლები მშიერმა და მწყურვალმა. მას რა თქმა უნდა, ეს თანხა არ ეკუთვნოდა".
"კვლავ გრძელდება საარჩევნო სუბიექტების ანონიმურად დაფინანსების ძველი მანკიერი პრაქტიკა. ამაზე არც ხელისუფლების შეცვლას მოუხდენია რაიმე გავლენა. ყველანაირი სამართლიანობის საფუძველი თავისუფალი და სამართლიანი არჩევნებია. ბიზნესი კი კვლავინდებურად შეშინებულია და სურს ანონომურად ამოუდგეს მხარში მისთვის სასურველპოლიტიკურ ძალას", - აცხადებს გოცირიძე.
