საფრანგეთის რესპუბლიკის პრეზიდენტის, ფრანსუა ოლანდის საქართველოში ვიზიტის ფარგლებში, 2014 წლის 13 მაისს, 13.00 საათზე თბილისის საგამოფენო ცენტრ "Expo Georgia"-ში საქართველო-საფრანგეთის ეკონომიკური ფორუმი გაიმართება, რომელსაც ორგანიზებას უწევენ საქართველოს ეროვნული საინვესტიციო სააგენტო, საქართველოში საფრანგეთის რესპუბლიკის საელჩო, საფრანგეთი-საქართველოს სავაჭრო და სამრეწველო პალატა და საქართველოს თანაინვესტირების ფონდი.
აღნიშნულ ფორუმში ქართული და ფრანგული მხრიდან როგორც საჯარო, ისე კერძო სექტორის 300-მდე წარმომადგენელი მიიღებს მონაწილეობას. ეკონომიკური ფორუმზე საქართველოს ეკონომიკის ძირითად მიმართულებებზე (სოფლის მეურნეობა, ტურიზმი, ენერგეტიკა, ტრანსპორტი და ლოგისტიკა) კონცენტრირებული რამდენიმე თემატური პანელი იქნება წარმოდგენილი. ფორუმის მომხსენებლები იქნებიან საქართველოს საჯარო და კერძო სექტორების მაღალი რანგის წარმომადგენლები და მასში მონაწილეობას მიიღებენ საქართველოში ვიზიტად მყოფი მსხვილი ფრანგული კომპანიების ხელმძღვანელი პირები. ფორუმის ფარგლებში სტუმრებს სიტყვით მიმართავენ საქართველოს პრემიერ-მინისტრი, ირაკლი ღარიბაშვილი და საფრანგეთის რესპუბლიკის პრეზიდენტი, ფრანსუა ოლანდი.
ღონისძიების ფარგლებში ასევე დაგეგმილია საქართველოს მთავრობასა და საფრანგეთის რესპუბლიკის მთავრობას შორის ურთიერთთანამშრომლობის შესახებ ორი შეთანხმების ხელმოწერა:
1) საქართველოს მთავრობასა და საფრანგეთის რესპუბლიკის მთავრობას შორის საქართველოში საფრანგეთის განვითარების სააგენტოსა (AFD) და ეკონომიკური თანამშრომლობის ხელშეწყობისა და განვითარების საზოგადოების (PROPARCO) დაფუძნების და საქმიანობის შესახებ შეთანხმება

2) ფინანსური პროტოკოლი საქართველოს მთავრობასა და საფრანგეთის რესპუბლიკის მთავრობას შორის ჭიათურის მუნიციპალიტეტის საბაგირო გზების რეკონსტრუქცია-რეაბილიტაციის პროექტთან დაკავშირებით
აღნიშნულ შეთანხმებებს საფრანგეთის რესპუბლიკის მთავრობის სახელით საგარეო ვაჭრობის, ტურიზმის ხელშეწყობისა და ფრანგული დიასპორის საკითხებში საფრანგეთის რესპუბლიკის სახელმწიფო მდივანი, ქალბატონი ფლერ პელერინი, ხოლო საქართველოს მთავრობის სახელით კი საქართველოს ფინანსთა მინისტრი, ბატონი ნოდარ ხადური მოაწერენ ხელს.