ორმხრივი შეხვედრის შემდეგ, საქართველოსა და თურქეთის პრეზიდენტებმა მედიისთვის ერთობლივი განცხადებების გააკეთეს. საქართველოს პრეზიდენტმა თურქი კოლეგის ვიზიტს შინაარსიანი უწოდა და მის მნიშვნელობაზე ისაუბრა. გიორგი მარგველაშვილის განცხადებით, შეხვედრების მსვლელობისას უმნიშვნელოვანეს თემები განიხილეს, რომელთა შორის იყო ეკონომიკური, ინფრასტრუქტურული და ტრანსნაციონალური პროექტები. ქვეყნის პირველმა პირმა მადლიერებით აღნიშნა, რომ თურქეთი მხარს უჭერს საქართველოს ისეთ ფუნდამენტურ საკითხებში, როგორიცაა ქვეყნის ტერიტორიული მთლიანობა და მისწრაფება ევრო და ჩრდილოატლანტიკურ სტრუქტურებში ინტეგრაციისკენ. საქართველოს პრეზიდენტმა დადებითად შეაფასა საქართველო-თურქეთის თანამშრომლობა ეკონომიკის, ბიზნესის, სახედრო და კულტურის სფეროებში და აღნიშნა, რომ ამ მიმართულებით მუშაობა კვლავაც უნდა გაგრძელდეს. მისი თქმით, კულტურული მემკვიდრეობისა და რელიგიური ჯგუფების ინტერესები ორივე ქვეყანაში ერთნაირად არის და იქნება დაცული. ქვეყნის პირველმა პირმა ყურადღება კეთილმეზობლური ურთიერთობის ტრადიციების შენარჩუნების აუცილებლობაზეც გაამახვილა, რომელსაც ქართველმა და თურქმა ხალხმა ჩაუყარა საფუძველი.
თურქეთის პრეზიდენტმა, თავის მხრივ, მადლობა გადაუხადა გიორგი მარგველაშვილს გულთბილი მიღებისთვის და ყურადღება ორი ქვეყნის მჭიდრო ურთიერთობაზე გაამახვილა. მისი თქმით თურქეთი საქართველოს ძლიერი მხარდამჭერია და მკაფიოდ გამოხატავს საკუთარ პოზიციას საერთაშორისო დონეზე. აბდულა გიულიმ აღნიშნა, რომ აუცილებელია გაღრმავდეს თანამშრომლობა თავისუფალი ვაჭრობისა და ინვესტიციების მოზიდვის, ასევე სატრანსპორტო მიმართულებით. რაც შეეხება კულტურული მემკვიდრეობის თემას, მისი თქმით, რომ ორივე მხარე ვალდებულია ზრუნავდეს ძეგლების მოვლასა და აღდგენაზე. მისი განცხადებით, ასევე ძალზე მნიშვნელოვანია რელიგიური მრწამსის თავისუფლება, რასაც ორივე ქვეყანა იცავს და მომავალშიც დაიცავს.
გიორგი მარგველაშვილმა და აბდულა გიულიმ სამიტის მნიშვნელობაზეც ისაუბრეს, რომელიც საქართველოს, თურქეთისა და აზერბაიჯანის ლიდერების მონაწილეობით გაიმართა. როგორც ლიდერებმა აღნიშნეს, მხარეები სამიტის რეგულარულად გამართვაზე შეთანხმდნენ. მათი თქმით, მსგავს შეხვედრებს რეგიონისთვის უდიდესი მნიშვნელობა აქვს და თანამშრომლობის კიდევ უფრო გაღრმავებას უწყობს ხელს.
პრეზიდენტის სასახლიდან აბდულა გიული გმირთა მოედანზე გაემგზავრა, სადაც გვირგვინით შეამკო დაღუპულ გმირთა მემორიალი.
