საქართველოსთვის მეტად მნიშვნელოვანია იყოს რეგიონის სატრანზიტო კორიდორის აქტიური მონაწილე, რადგან მას სასიცოცხლო მნიშვნელობა აქვს საქართველოს ეკონომიკური განვითარების და სტაბილურობისათვის.
ამის შესახებ საქართველოს პრემიერ-მინისტრმა ირაკლი ღარიბაშვილმა საქართველო-თურქეთის ეკონომიკურ ფორუმზე სიტყვით გამოსვლისას განაცხადა, სადაც ორ ქვეყანას შორის სავაჭრო ურთიერთობაზე ისაუბრა.
მისი განმარტებით, აღნიშნულს სასიცოცხლო მნიშვნელობა აქვს ჩვენი ქვეყნის ეკონომიკური განვითარებისა და სტაბილურობისათვის.
"ჩვენ ძალისხმევას არ ვიშურებთ იმისათვის, რომ საქართველოში იყოს ხელსაყრელი გარემო ლოგისტიკური და გადამზიდავი კომპანიებისათვის. თუმცა, რაც არ უნდა იდეალური გარემო შევქმნათ, თქვენთან თანამშრომლობის გარეშე სასურველი შედეგები არ გვექნება. იმისათვის, რომ უზრუნველყოფილი იყოს საერთო სატრანზიტო კორიდორის კონკურენტუნარიანობა, უნდა განვახორციელოთ ერთიანი პოლიტიკა და კოორდინირებული რეფორმები", - მიმართა ირაკლი ღარიბაშვილმა თურქეთის დელეგაციის წარმომადგენლებს.
ამასთან, პრემიერმა კიდევ ერთხელ დაადასტურა, რომ საქართველო მზად არის ამ მიმართულებით აქტიურად იმუშაოს თურქეთთან, აზერბაიჯანთან და ყველა დაინტერესებულ მხარესთან.
"თურქეთი და თურქული ბიზნესი საქართველოში საკმაოდ აქტიურია და ინვესტიციების განხორციელების კუთხით პირველ ხუთეულში შედის. მჯერა, რომ მომავალში ეს ტენდენცია შენარჩუნდება და ჩვენი თანამშრომლობა ხელს შეუწყობს უფრო მეტი საინტერესო და წარმატებული პროექტის განხორციელებას. როგორც მთავრობის მეთაურმა მინდა გითხრათ, რომ საქართველოს კარი ღიაა თქვენთვის, თუ გადაწყვეტთ საქართველოში ბიზნესსაქმიანობის წამოწყებას. ჩვენი მხრივ კი, მინდა დაგარწმუნოთ, რომ საქართველოში ნამდვილად არის სამართლიანი, გამჭვირვალე და უსაფრთხო საინვესტიციო გარემო და თქვენ მიერ განხორციელებული ინვესტიციის თითოეული ცენტი იქნება დაცული კანონისა და სახელმწიფოს მიერ", - აღნიშნა საქართველოს პრემიერ-მინისტრმა.
