"არასაპარლამენტო ოპოზიცია" პრემიერ-მინისტრ ირაკლი ღარიბაშვილს მოუწოდებს განსხვავებული აზრის მქონე საზოგადოების მიმართ იყოს კონსტრუქციული და გაითვალისწინოს არასამთავრობო სექტორის შენიშვნები.
ამასთან დაკავშირებით "არასაპარლამენტო ოპოზიციამ" განცხადება გაავრცელა, რომლსაც "ჯი-ეიჩ-ენი" უცვლელად გთავაზობთ:
"პრემიერ-მინისტრმა ჟურნალისტებთან საუბრისას არასამთავრობოთა კამპანიას "ეს შენ გეხება - ისევ გვისმენენ" სახელმწიფოს წინააღმდეგ მიმართული ქმედება უწოდა და აღნიშნა, რომ ეს საქართველოს საერთაშორისო იმიჯზე ცუდად მოქმედებს.
პრემიერ-მინისტრის მხრიდან არასამთავრობო სექტორის საქმიანობის ამგვარი შეფასება, ძალიან შორს დგას დემოკრატიული ქვეყნების ლიდერების რიტორიკისგან. ირაკლი ღარიბაშვილი უნდა შეეჩვიოს კრიტიკას, მით უფრო, რომ არასამთავრობოების პოზიციები ამ კონკრეტულ შემთხვევაში სავსებით სამართლიანია და ეს კამპანიაც მიზნად კანონმდებლობის დახვეწას და უკანონო მოსმენების პრევენციას ისახავს.
მოვუწოდებთ საქართველოს მთავრობის მეთაურს, ნუ გაიმეორებს წინა ხელისუფლების მიერ დაშვებულ შეცდომებს, იყოს განსხვავებული აზრის მქონე საზოგადოების მიმართ კონსტრუქციული და ნაცვლად კონფრონტაციისა, გაითვალისწინოს არასამთავრობო სექტორის შენიშვნები", - ნათქვამია განცხადებაში.
მასალის გამოყენების პირობები
