ანტიდისკრიმინაციული პაკეტი მეორე მოსმენით სავარაუდოდ, დღევანდელ პლენარულ სხდომაზე გავა. საკითხის დღის წესრიგში ჩასმაზე გადაწყვეტილება პარლამენტის ბიურომ უნდა მიიღოს , რომელიც 11:00 საათისთვის დაიწყება.
მთავრობის საკანონმდებლო ინიციატივის განხილვა გუშინ, ადამიანის უფლებათა დაცვის სხდომაზე 5-საათზე მეტი ხნის განმავლობაში მიმდინარეობდა. სხდომაში მონაწილე სასულიერო პირებისა და მათთან ერთად არასაპარლამენტო ოპოზიციის მთავარ მოთხოვნას პირის მადისკრიმინირებელ ნიშნებს შორის "სექსუალური ორიენტაციის" და "გენდერული იდენტობის" პუნქტების ამოღება იყო. მათი შეფასებით, კანონში აღნიშნული ტერმინების დაფიქსირება "ცოდვისა და უზნეობის დაკანონებას ნიშნავს".
პროექტთან დაკავშირებით შენიშვნები აქვთ არასამთავრობო ორგანიზაციების წარმომადგენლებს და სახალხო დამცველის აპარატს. მათი წინადადებაა, რომ სახალხო დამცველი დისკრიმინაციის წინააღმდეგ ბრძოლის საქმეში ეფექტური მექნიზმებით აღიჭურვოს. მათ კიდევ ერთხელ დასვეს ჯარიმების დაწესების საკითხი. თავის მხრივ მმართველმა გუნდმა არც ერთი და არც მეორე მხარის მოთხოვნები არ გაითვალისწინა.
ანტიდისკრიმინაციული პაკეტის საფუძველზე პირდაპირ იკრძალება ნებისმიერი ნიშნით დისკრიმინაცია. კანონის მიზანია დისკრიმინაციის ნებისმიერი ფორმის აღმოფხვრა და თანასწორუფლებიანობა რასის, კანის ფერის, ენის, სქესის, მოქალაქეობის, წარმოშობის, დაბადების, საცხოვრებელი ადგილის, ქონებრივი ან წოდებრივი მდგომარეობის, რელიგიის ან რწმენის, ეროვნული, ეთნიკური ან სოციალური კუთვნილების, პროფესიის, ოჯახური მდგომარეობის, ჯანმრთელობის მდგომარეობის, შეზღუდული შესაძლებლობის, სექსუალური ორიენტაციის, გენდერული იდენტობის, გამოხატვის, პოლიტიკური ან სხვა შეხედულებების, ან სხვა ნიშნის მიუხედავად. კანონპროექტი კრძალავს დისკრიმინაციას როგორ საჯარო, ასევე კერძო სფეროში.
დისკრიმინაციის აღმოფხვრისა და თანასწორობის უზრუნველყოფის საკითხებზე ზედამხედველობას სახალხო დამცველი განახორციელებს. პროექტის მიხედვით, სახალხო დამცველი დისკრიმინაციის წინააღმდეგ ბრძოლის, პრევენციის და თანასწორობის შესახებ სპეციალურ ანგარიშს მოამზადებს.
