საპარლამენტო უმრავლესობის წევრის ოთარ ჩრდილელის განცხადებით, ანტიდისკრიმინაციული კანონპროექტი კატაბასისი არ არის და ქვეყნის დაღმასვლას არ ნიშნავს.
როგორც ჩრდილელმა ადამიანის უფლებათა დაცვის საპარალმენტო კომიტეტის სხდომაზე კანონპროექტის მუხლობრივ განხილვისას განცახდა, აღნიშნული დოკუმენტი არავისთვის ახალი უფლებების მინიჭებას არ ითვალისიწინებს, არამედ მასში თავმოყრილია სხვა საკანონმდებლო აქტებში მიმოფანტული უფლებები.
"იყო რამდენიმე მცდელობა მისი ულტრირების, ან კონტექსტიდან ამოგლეჯილი სიტყვებით გადმოეცათ კანონპროექტის შინაარსი, მაგრამ გარწმუნებთ ყველას, რომ უმრავლესობის არცერთი წევრი არა მხოლოდ ამ კანონზე, არამედ ყველა სხვა კანონზე მუშაობისას ქართველი ერის ინტერესის საწინააღმდეგოს არაფერს მიიღებს და არ შექმნის. ჩვენ არ ვართ ის ხელისუფლება, რომელიც ბათუმში ფერიის მთაზე ეკლესიას დაანგრევს, ჩვენ არ ვართ ის ადამიანები, რომლებიც "უაზს" მოახტებიან და გლდანის ეკლესიას შეანგრევენ, არც ის ხალხი ვართ, ვინც მრევლს ქვებით დასდევს. გვერწმუნეთ, ეს კანონი ქვეყნისათვის კატაბაზისი არ არის, ის სტრიქონებს შორის არ იკითხება. ეს კანონი მაქსიმალურად მორგებულია დღევანდელ ქართულ რეალობაზე, რაც გულისმობს ჰუმანიზმისა და ტოლერანტობის იდეებს, რომელზეც ყოველთვის იდგა ჩვენი ქვეყანა", -განაცხადა ჩრდილელმა საპარლამენტო კომიტეტის სხდომაზე.
დისკრიმინაციული პაკეტის საფუძველზე, რომელიც პარლამენტის პლენარულ სხდომაზე განსახილველად ხვალ უნდა გაიტანონ, პირდაპირ იკრძალება ნებისმიერი ნიშნით დისკრიმინაცია.
კანონის მიზანია დისკრიმინაციის ნებისმიერი ფორმის აღმოფხვრა და თანასწორუფლებიანობა რასის, კანის ფერის, ენის, სქესის, მოქალაქეობის, წარმოშობის, დაბადების, საცხოვრებელი ადგილის, ქონებრივი ან წოდებრივი მდგომარეობის, რელიგიის ან რწმენის, ეროვნული, ეთნიკური ან სოციალური კუთვნილების, პროფესიის, ოჯახური მდგომარეობის, ჯანმრთელობის მდგომარეობის, შეზღუდული შესაძლებლობის, სექსუალური ორიენტაციის, გენდერული იდენტობის, გამოხატვის, პოლიტიკური ან სხვა შეხედულებების, ან სხვა ნიშნის მიუხედავად. კანონპროექტი კრძალავს დისკრიმინაციას როგორ საჯარო, ასევე კერძო სფეროში.
