ანტიდისკრიმინაციული პაკეტის განხილვის გადადების თხოვნასთან დაკავშირებით ადამიანის უფლებათა დაცვის საპარლამენტო კომიტეტის თავმჯდომარე ეკა ბესელია საქართველოს კათოლიკოს-პატრიარქს, ილია მეორეს პირადად ესაუბრა.
ამის შესახებ ეკა ბესელიამ საკომიტეტო სხდომის მონაწილეებს მას შემდეგ აცნობა, რაც "არასაპარლამენტო ოპოზიციის" წარმომადგენელმა ჯონდი ბაღათურიამ სხდომაზე განხილვის გადადება მოითხოვა და დეპუტატებს პატრიარქის თხოვნის გათვალისწინება მოსთხოვა.
ეკა ბესელიამ განმარტა, რომ კანონები პარლამენტში რეგლამენტით დადგენილ ვადაში იხილება, ხოლო დღევანდელ სხდომაზე ხდება არა საბოლოო გადაწყვეტილების მიღება, არამედ მუხლობრივი განხილვა - საზოგადოების ფართო წარმომადგენლობითი მონაწილეობით.
"მის უწმინდესობას ვუთხარი, რომ ვადებთან დაკავშირებით არსებობს გარკვეული შეზღუდვები. პროექტი ხუთ თვეზე მეტია სამუშაო ფორმატში იხილება. იყო სხვადასხვა დისკუსია, მაგრამ კომიტეტი არის შემოსაზღვრული გარკვეული ვადებით. ჩვენ გვაქვს დადგენილ ვადაში განხილვის ვალდებულება", - განმარტა ბესელიამ და აღნიშნა, რომ კომიტეტმა რეგლამენტის დარღვევით განხილვაზე უარი რომ თქვას, ეს პროექტის განხილვის პროცესს არ აჩერებს.
