საქართველოს პარლამენტის თავმჯდომარე დავით უსუფაშვილი და საპარლამენტო დელეგაცია ოფიციალური ვიზიტით მოლდოვის რესპუბლიკის დედაქალაქში იმყოფებიან.
დავით უსუფაშვილმა პირველი შეხვედრა მოლდოველ კოლეგასთან, იგორ კორმანთან გამართა.
შეხვედრაზე მხარეებმა ორ ქვეყანას შორის უკვე არსებული კულტურული, ეკონომიკური და პოლიტიკური ურთიერთობები განიხილეს და სამომავლო თანამშრომლობის პერსპექტივები მიმოიხილეს.
პარლამენტის თავმჯდომარეებმა ყურადღება გაამახვილეს ურთიერთობების კიდევ უფრო ინტენსიურ და პრაქტიკულ სიბრტყეში გადაყვანის მნიშვნელობაზე და საკომიტეტო დონეზე სამუშაო შეხვედრების ჩატარების მზაობა გამოთქვეს.
საკანონმდებლო ორგანოს პირველმა პირებმა ასოცირების ხელშეკრულების ხელმოწერის შემდეგ გასატარებელ ღონისძიებებზეც ისაუბრეს და ევროინტეგრაციის გზაზე პროცესის შეუფერხებლად წარმართვისთვის კოორდინირებული მოქმედებები და გეგმები დასახეს.
„ვილნიუსის სამიტზე მიღებულმა გადაწყვეტილებამ ორი ქვეყნის მომავალი გეგმები კიდევ უფრო დაახლოვა. ივნისში საქართველო და მოლდოვა ევროკავშირთან ასოცირების ხელშეკრულების ხელმოწერას ელოდება, რასაც თან ახლავს ბევრი სამუშაო და ჩვენ შევთანხმდით რომ ორი ქვეყნის პარლამენტი ურთიერთთანამშრომლობით წარმართავს ამ პროცესს", - განაცხადა დავით უსუფაშვილმა.
პარლამენტის თავმჯდომარეების შეხვედრისას საუბარი ასევე შეეხო უკრაინაში მიმდინარე მოვლენებს და ორივე მხარის მიერ რეგიონში სიტუაციის უკეთესობისკენ შეცვლის იმედი გამოითქვა.
შეხვედრის დასრულების შემდეგ დავით უსუფაშვილმა და იგორ კორმანმა ერთობლივი ბრიფინგი გამართეს.
