საქართველოს პრეზიდენტის გიორგი მარგველაშვილის განცხადებით, რუსეთთან გაუცხოება და ურთიერთობის გაწყვეტა სწორი არჩევანი არ არის, რადგან ეს რუსეთს კიდევ უფრო აგრესიულ, არაპროგნოზირებადს და სახიფათოს გახდის.
როგორც პრეზიდენტმა "ასოშეიტედ პრესთან" ინტერვიუში განაცხადა, დიპლომატებმა უნდა დაარწმუნონ რუსეთი, რომ ურთიერთობები მეზობელ და მსოფლიოს სხვა ქვეყნებთან სამხედრო ინტერვენციით არ ყალიბდება.
გიორგი მარგველაშვილის განცხადებით, საქართველოს არ ეშინია მეზობელი რუსეთის მხრიდან რაიმე სამხედრო შურისძიებისა, რომელსაც რუსეთი საქართველოს ევროპული არჩევანის გამო განახორციელებს.
"თუმცა, ჩვენ მაინც ფრთხილად ვართ", - აღნიშნავს მარგველაშვილი.
პრეზიდენტი არ ფიქრობს, რომ 21-ე საუკუნეში ვინმეს უფლება აქვს დასაჯოს საქართველო, მოლდოვა ან უკრაინა, სუვერენული გადაწყვეტილებების მიღების გამო.
მარგველაშვილი პრაღაში ორდღიან სამიტს დაესწრო, რომელშიც პოსტსაბჭოთა ქვეყნების პრეზიდენტები ევროპელ კოლეგებთან ერთად მონაწილეობდნენ.
