ბაჰამის თანამეგობრობაში საქართველოს საგანგებო და სრულუფლებიანმა ელჩმა (რეზიდენციით ქ. ვაშინგტონი, აშშ) არჩილ გეგეშიძემ ბაჰამის გენერალ-გუბერნატორს სერ არტურ ფულკს რწმუნებათა სიგელები გადასცა.
რწმუნებათა სიგელების გადაცემის ცერემონიალი ქ. ნასაუში, მთავრობის სახლში გაიმართა, ცერემონიალის დასრულების შემდეგ შეხვედრა გაიმართა, რომელზედაც მხარეებმა ორ ქვეყანას შორის არსებული ურთიერთობების გაღრმავებისა და სამომავლო თანამშრომლობის პერსპექტივები განიხილეს.
„როგორც საქართველოს ელჩი ბაჰამის თანამეგობრობაში ძალ-ღონეს არ დავიშურებ ურთიერთობების განვითარებისთვის როგორც ორმხრივ, ასევე მრავალმხრივ ფორმატში. ჩემი მხრივ, მოუთმენლად ველი თქვენთან თანამშრომლობას და იმედი მაქვს, მეგობრული ურთიერთობები ჩვენ ხალხებსა და ქვეყნებს შორის ისეთივე უჭკნობი იქნება, როგორც ბაჰამის ეროვნული ყვავილი, რომელიც მთელი წლის განმავლობაში ხარობს" -განაცხადა არჩილ გეგეშიძემ ცერემონიალის მსვლელობისას.
"იმედი მაქვს, ჩვენ ქვეყნებს შორის სამწლიანი დიპლომატიური ურთიერთობა დაგვეხმარება კიდევ უფრო გავზარდოთ იმ როლის საერთაშორისო მნიშვნელობა, რომლის შესრულება პატარა ქვეყნებს შეუძლიათ და უნდა ასრულებდნენ მსოფლიო არენაზე. განსაკუთრებით, როდესაც საქმე ეხება მშვიდობის, უსაფრთხოების, სუვერენიტეტის, ტერიტორიული მთლიანობისა და ადამიანის უფლებების დაცვისკენ სწრაფვას", _ დასძინა თავის მხრივ გენერალ-გუბერნატორმა.
საგარეო უწყების ინფორმაციით, სერ არტურ ფულკთან შეხვედრამდე კი შეხვედრა გაიმართა ბაჰამის საგარეო საქმეთა და იმიგრაციის მინისტრთან ფრედრიკ მიტჩელთან, რომელსაც ელჩმა რწმუნებათა სიგელების ასლები გადასცა.
