პარლამენტი პლენარულ სხდომებს ორი სასესიო კვირის განმავლობაში გამართავს და ამის შემდეგ არჩევნებამდე დარჩენილი ერთი თვის განმავლობაში სასესიო რეჟიმში მუშაობას შეაჩერებს.
როგორც პარლამენტის თავმჯდომარე დავით უსუფაშვილმა ბიუროს ორშაბათის სხდომაზე განმარტა, სესიები გაიმართება მომავალ კვირას, 30 აპრილი - 2 მაისის ფარგლებში და ასევე 14-16 მაისს. ამის შემდეგ წინასაარჩევნოდ ერთი თვის განმავლობაში პლენარული სხდომები შეწყდება, თუმცა, მისივე თქმით, საჭიროების შემთხვევაში ჩატარდება საკომიტეტო სხდომები და სხვა საჭირო ღონისძიებები.
პარლამენტის რეგლამენტის თანახმად, საპარლამენტო, საპრეზიდენტო, ან ადგილობრივ არჩევნებამდე ერთი თვის განმავლობაში, როგორც წესი, პარლამენტის პლენარული სხდომები არ იმართება.
პარლამენტი პლენარული სხდომების რეჟიმში მუშაობას ადგილობრივი არჩევნების შემდეგ დაუბრუნდება. ზაფხულში, ერთი თვის განმავლობაში, რიგგარეშე სხდომები ჩატარდება.
