"ვისოლმა" 22 აპრილს, დედამიწის საერთაშორისო დღეს გამართულ „ქართული მწვანე ბიზნესის დაჯილდოებაზე" (Georgian Green Business Award) საქართველოს გარემოსა და ბუნებრივი რესურსების დაცვის სამინისტროსგან „მწვანე კამპანიებისთვის" ჯილდო მიიღო. „ქართული მწვანე ბიზნესის დაჯილდოებაზე" გამარჯვებულები ცხრა ნომინაციაში გამოვლინდნენ. სხვადასხვა ნომინაციებში გამარჯვებული ბიზნესკომპანიები საქართველოს გარემოსა და ბუნებრივი რესურსების დაცვის მინისტრმა ხათუნა გოგალაძემ დააჯილდოვა.
„გარემოს დაცვა „ვისოლის" კორპორაციული სოციალური პასუხისმგებლობის სტრატეგიის ერთ-ერთი ყველაზე ძირითადი მიმართულებაა. კომპანია უახლესი ევროპული სტანდარტის (EURO 5) გოგირდისაგან თავისუფალ, უმაღლესი ხარისხის „ეკოს" საწვავს სთავაზობს მომხმარებელს გარემოსათვის უსაფრთხო შეკუმშულ ბუნებრივ ავტოგაზთან ერთად. „ვისოლის" ავტოგასამართი სადგურების და ტერმინალების მაღალტექნოლოგიური აღჭურვილობა, გარემოსდაცვითი მოთხოვნების კონტროლი და შესრულება უზრუნველყოფს დაღვრის პრევენციას, ატმოსფერული ჰაერის დაბინძურების პრევენციას და ნარჩენების შემცირებას. რაც ყველაზე მნიშვნელოვანია „ვისოლი" საზოგადოების ცნობადობის ამაღლებას ცდილობს სხვადასხვა მნიშვნელოვან გარემოსდაცვით თემებზე", - აცხადებს „ვისოლ ჯგუფის" პრეზიდენტი სოსო ფხაკაძე.
გარემოსა და ბუნებრივი რესურსების დაცვის სამინისტრომ კონკურსი „Georgian Green Business Award" " 2013 წლის ოქტომბერში გამოაცხადა, რომელიც მიზნად ისახავდა ქართული ბიზნესის წარმომადგენლებისთვის გარემოსდაცვითი და სოციალური პასუხისმგებლობის ფარგლებში მოქმედების ხელშეწყობას.