პარლამენტის 43 წევრს 2012 წლის ოქტომბრიდან ჰქონდა, ან ისევ აქვს ბიზნესაქტივები. ამის შესახებ საუბარია "საერთაშორისო გამჭვირვალობის" ანგარიშში.
აღნიშნული ორგანიზაციის მიერ ჩატარებული კვლევის თანახმად, მათგან 28 საპარლამენტო უმრავლესობის წარმომადგენელია, 9 საპარლამენტო უმცირესობის, ხოლო 6 დამოუკიდებელი დეპუტატია.
არასამთავრობო ორგანიზაციამ მე-8 მოწვევის პარლამენტის პირველი წლის მუშაობის შესახებ ანგარიშის პრეზენტაცია დღეს გამართა.
ანგარიშში საუბარია პარლამენტის წევრების კავშირებზე ბიზნესებთან, დეპუტატთა არადეკლარირებული სამეწარმეო საქმიანობისა და ასევე, საკანონმდებლო ორგანოში მათი დასწრების შესახებ.
დოკუმენტში აღნიშნულია, რომ პარლამენტარები: ზვიად კვაჭანტირაძე, გოგი თოფაძე და თამაზ ავდალიანი არიან ისეთები, რომელთაც არა მარტო წილები აქვთ ბიზნესში, არამედ პარლამენტში საქმიანობის პარალურად, კომპანიების დირექტორების თანამდებობასაც იკავებდნენ, რისი უფლებაც მათ კანონით არ ჰქონდათ.
ამასთან, კვლევის თანახმად, ირკვევა, რომ პარლამეტის წევრთა გარკვეული ნაწილის მიერ წარდგენილ წლიურ ქონებრივ დეკლარაციებში მათი მიმდინარე და წარსული ბიზესსაქმიანობა არასრულად არის ასახული.
"საერთაშორისო გამჭირვალობა" განმარტავს, რომ ეს პირდაპირ არ წარმოადგენს დეპუტატის უფლებამოსილების შეწყვეტის საფუძველს, თუმცა, საჭიროა პარლამენტის საპროცედურო საკითხთა და წესების კომიტეტის მიერ ამ ფაქტების შესწავლა და ფაქტობრივი გარემოებების დადგენის შემდგომ კანონით გათვალისწინებული ზომების მიღება.
