ამის შესახებ ნათქვამია ინფორმაციაში, რომელსაც რუსეთის საგარეო საქმეთა სამინისტრო მინისტრის მოადგილის გრიგორი კარასინისა და რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძის გუშინდელი შეხვედრის შესახებ ავრცელებს.

"შეხვედრისას დაფიქსირდა შემდგომი წინსვლა ორმხრივ ურთიერთობებში. აღინიშნა, რომ დიალოგის ატმოსფეროზე დადებითად იმოქმედა საქართველოს მონაწილეობამ სოჭის ოლიმპიადაში. ქართული ღვინის, მინერალური წყლისა და სოფლის მეურნეობის პროდუქტების რუსულ ბაზარზე დაბრუნების შემდეგ შესამჩნევია ტვირთბრუნვის ზრდა. აღდგა საავტომობილო მიმოსვლა, ზემო ლარსის გამშვები პუნქტის მუშაობა 24-საათიან რეჟიმზეა გადასული. განხილულi იქნა რეგულარული ავიამიმოსვლის აღდგენის შესაძლებლობა. მიღწეულ იქნა შეთანხმება, უახლოეს პერიოდში შესაბამისი ორმხრივი კონსულტაციების მორიგი რაუნდი გაიმართოს საავიაციო ხელმძღვანელობებს შორის. დადებითი შეფასება მიეცა საბაჟო სამსახურებს შორის კონტაქტების აღდგენას, ასევე სავაჭრო-სამრეწველო პალატების ურთიერთობას. ჰუმანიტარულ ნაწილში აღინიშნა კულტურული, სპორტული, სამეცნიერო, რელიგიური და სხვა ტიპის აქტივობების ზრდა ორივე ქვეყნის მონაწილეობით. ამას ხელი შეუწყო საქართველოს მოქალაქეებზე ვიზების გაცემის რაოდენობის ზრდამ. 2013 წელს დაახლოებით 25 000 ვიზა გაიცა. მოხდა აზრთა გაცვლა-გამოცვლა სატრანსპორტო და ენერგეტიკის სფეროებში ორმხრივი პროექტების პერსპექტივები შესახებ", - ნათქვამია განცხადებაში.