საპარლამენტო უმცირესობის წევრმა როლანდ ახალაიამ პარლამენტის პლენარულ სხდომაზე პარლამენტის თავმჯდომარეს მიმართა და საკუთარი პოზიციის გამოხატვისას დავით უსუფაშვილს ცოტნე ბაკურიასთან ნათესავური კავშირზე მიანიშნა.
" თქვენ ერთნაირად უნდა ზრუნავდეთ როგორც უმრავლესობის, ისე უმცირესობის ავტორიტეტზე, მის საქმიანობასთან დაკავშირებულ საკითხებზე. მართალი რომ გითხრათ, ძალიან გამაკვირვა თქვენმა ასეთმა სწრაფმა რეაქციამ იმ საკითხთან დაკავშირებით, რაც ჩემთან დაკავშირებით კანონის შესწორებას მოჰყვა. სწორად გამიგეთ, მე ჩემმი ცხოვრება ისე მივლია, რომ იმუნიტეტი არ დამჭირვებია. ჩემი იმუნიტეტი ჩემი სიმართლეა, მაგრამ მინდა, ფაქტთან დაკავშირებით გაოცება გამოვხატო. არ მინდა, დავიჯერო, რომ თქვენი პირადი დამოკიდებულება ყოფილიყო ამის ერთ-ერთი მიდგომა. მე გულახდილად გეტყვით, არ ვიცოდი, მაგრამ ახლა შემთხვევით გავიგე თქვენი ნათესაური კავშირი ცოტნე ბაკურიასთან და მგონია, რომ ეს არაფერ შუაშია. მე უფრო მგონია, რომ თქვენი პოლიტიკური მორჩილების გამო, თქვენ ამ კანონს მხარი აუბით", - განაცხადა ახალაიამ.
როლანდ ახალაიამ საპარლამენტო უმრავლესობასაც მიმართა. მისი თქმით, ამ კანონის მხარდაჭერით მათ თავიანთი თავის საწინააღმდეგო გააკეთეს და ამის შედეგს ხვალ და ზეგ დაინახავენ.
"თქვენ პროკურატურა საკანონმდებლო ორგანოს კონტროლიდან გამოიყვანეთ. დღეს საუკუნის დანაშაული ხდება ქვეყანაში, გავა დრო და თქვენ თვითონ ნახავთ, თუმცა გონიერი ადამიანი ხართ, შეიძლება, დღესაც ყველაფერს კარგად ხედავთ, მაგრამ რაღაცა მომენტების გამო თავს იკავებთ. გამოდიან თქვენი პარლამენტარები, არღვევენ უდანაშაულობის პრეზუმფციას და აცხადებენ, აი, თუნდაც ჟორჟოლიანი, რომ ახალაია მკვლელია. ჟორჟოლიანმა თავისი განვლილი გზებს გადახედოს სტუდენტობიდან დღემდე. ყველამ ვიცით, ვინ რას წარმოადგენს, ამიტომ ასეთი მიდგომა ცუდია. დღეს ჩემთვის აღკვეთის ღონისძიებით შევიდნენ და ჰგონიათ, რომ ამით შემაშინებენ და გამაჩერებენ? ტელეფონზე მისმენენ რამდენი ხანია. მე ამის ფაქტებსაც დავდებ და ერთ-ერთი ფაქტი ისა, რომ როდესაც ზუგდიდში გამოვჩნდი, დარეკეს და უთხრეს, რომ ის ადგილზეა და ბრალის წასაყენებლად დაიბარეთო. ეგონათ, რომ არ მივიდოდი. მე დასამალი არაფერი მაქვს. პირიქით, ეს მაწყობს, რომ ხალხმა ნახოს, რას მედავებიან. სამწუხაროდ, დღევანდელმა ხელისუფლებამ სასამართლოში შეაღწია, თუმცა იქ გმირი მოსამართლეები კიდევ არიან", - განაცხდა ახალაიამ.
როლანდ ახალაიამ ევროკავშირისა და აშშ-ის ელჩებსაც მიმართა და მოუწოდა, სასამართლო რეფორმაში მათ მიერ დახარჯული ფულის შედეგად, ნახონ რა ხდება პროკურატურაში.
"დაბრუნდა ყაჩაღობისთვისა და კორუფციისთვის გაყრილი ხალხი. თქვენ ამას ყურადღებას არ აქცევთ, პირიქით, ახალისებთ კიდეც", - განაცხადა ახალაიამ.
