პრემიერ-მინისტრის, ირაკლი ღარიბაშვილის ხელმძღვანელობით, ეროვნული ოლიმპიური კომიტეტის ოფისში ევროპის ახალგაზრდული ოლიმპიური ფესტივალის - "თბილისი 2015"-ის ჩატარების ხელშემწყობი სხდომა მიმდინარეობს.
ფესტივალის საორგანიზაციო კომიტეტის თავმჯდომარის ალექსი ახვლედიანის განცხადებით, ირაკლი ღარიბაშვილი ევროპის ოლიმპიური კომიტეტის დამკვირვებლების მოხსენებას მოისმენს, რომლებიც ფესტივალისთვის თბილისში ჩატარებულ სამუშაოებს სამი დღის განმავლობაში სწავლობდნენ.
"ჩვენ, ფესტივალის საორგანიზაციო კომიტეტმა გავიარეთ სამდღიანი მონიტორინგი ევროპის ოლიმპიური კომიტეტის დამკვირვებლების მხრიდან და დღეს სტუმრები პრემიერს მოახსენებენ როგორც გაწეული საქმიანობის შესახებ ანგარიშს, ისე მომავალი გეგმების შესახებ, რომელიც ევროპის კომიტეტმა დაგვისახა", - აღნიშნა ალექსი ახვლედიანმა.
დღეს ფესტივალთან დაკავშირებით აღნიშნული კომისიის მესამე სხდომა იმართება. კომისიას პრემიერ-მინისტრი ხელმძღვანელობს, მისი წევრები კი არიან - ლევან ყიფიანი, ნოდარ ხადური, ალექსანდრე ჭიკაიძე, ლერი ხაბელოვი, ალექსი ახვლედიანი და პაპუნა პეტრიაშვილი.
