მთავრობა აგრარულ უნივერსიტეტს 400 000 ლარის წართმევასაც უპირებს. როგორც აგრარული უნივერსიტეტის მიერ გავრცელებულ ინფორმაციაშია აღნიშნული, შეთანხმების მიხედვით, ცოდნის ფონდს 2013 წლის 24 დეკემბრამდე აგრარულ უნივერსიტეტში 8 მილიონი ლარის ოდენობის ინვესტიცია უნდა განეხორციელებინა, რისი გარანტიაც უნივერსიტეტის თანხა, 400 000 ლარია.
„14 აპრილს უნივერსიტეტში ეკონომიკის სამინისტროს წერილი შემოვიდა, სადაც უწყება სასწავლებელს 400 000 ლარიანი გარანტიის გაგრძელებას უკანონოდ თხოვს, წინააღმდეგ შემთხვევაში საგარანტიო თანხის სრულად ჩამოჭრით ემუქრება. საგარანტიო ვადის გაგრძელების საფუძველი არ არსებობს, რადგან ფონდმა ამ დროის განმავლობაში მიზნობრივად არა 8 მილიონი, არამედ 11 მილიონ 200 ათას ლარზე მეტი დახარჯა.
შეთანხმების მიხედვით 2014 ეკონომიკის სამინისტროს მიერ დასახელებული 14 აუდიტორული ორგანიზაციიდან უნივერსიტეტს უნდა აერჩია ერთ-ერთი, რომლის დასკვნაშიც გამოჩნდებოდა - განხორციელდა თუ არა შეთანხმების მიხედვით ნაკისრი ვალდებულება 8 მილიონი ლარის ინვესტირებასთან დაკავშირებით.
აგრარული უნივერსიტეტის ხელმძღვანელობის გადაწყვეტილებით მეტი გამჭვირვალობისთვის სასწავლებელმა სამი ასეთი ორგანიზაცია დაიქირავა. სამივემ საკუთარ დასკვნაში დაადასტურა, რომ უნივერსიტეტში ნამდვილად განხორციელდა იმაზე მეტი ინვესტიცია, ვიდრე ვალდებულებით ჰქონდა აღებული"- ნათქვამია განცხადებაში.
როგორც აგრარულ უნივერსიტეტში განმარტავენ, მდასკვნები დროულად გადაეგზავნა ეკონომიკის სამინისტროს, რომელსაც კანონმდებლობის მიხედვით იანვრის ბოლომდე უნდა დაედასტურებინა საინვესტიციო ვალდებულების შესრულება.
„სამწუხაროდ, ეს მორიგის პოლიტიკური შეტევაა უნივერსიტეტზე. სამინისტრომ გამოიჩინა გულგრილობა, გაექცა მასზე კანონით დაკისრებული მოვალეობის შესრულებას და არ დაადასტურა უნივერსიტეტის მხრიდან შესაბამისი ინვესტიციის განხორციელება. თუმცა, საკუთარი ხარვეზის გამოსწორების ნაცვლად სასწავლებელს იმ თანხის წართმევას უპირებს, რომელიც აგრარული უნივერსიტეტის სასწავლო-სამეცნიერო საქმიანობას ხმარდება და შესაბამისად, ჩამოჭრის შემთხვევაში აუცილებლად აისახება უნივერსტეტის საქმიანობაზე." - აცხადებს აგრარული უნივერსიტეტის რექტორი ლაშა გოცირიძე.