საგარეო საქმეთა მინისტრი მაია ფანჯიკიძე პოლონეთის, უნგრეთისა და ჩეხეთის ნატო-ში გაწევრიანების 15 წლისთავთან დაკავშირებულ ღონისძიებას დაესწრო.
ფოტოგამოფენა თავდაცვის სამინისტროში გაიმართა და მას აღმასრულებელი და საკანონმდებლო ხელისუფლების წევრები, ასევე დიპლომატიური კორპუსის წარმომადგენლები ესწრებოდნენ.
მაია ფანჯიკიძემ ღონისძიების მონაწილეებს სიტყვით მიმართა.
როგორც მინისტრმა აღნიშნა, ბოლო დროს განვითარებული მოვლენების ფონზე, ალიანსის მნიშვნელობა ევრო-ატლანგტიკური უსაფრთხოების არქიტექტურის თვალსაზრისით, კიდევ ერთხელ წარმოჩინდა.
ღონისძიებაზე სიტყვით გამოსვლისას მინისტრმა კიდევ ერთხელ ისაუბრა საქართველოს ევროატლანტიკურ მისწრაფებაზე და საქართველოს ხელისუფლების მიერ ამ მიმართულებით გადადგმულ ნაბიჯებზე.
„მინდა კიდევ ერთხელ დავადასტურო საქართველოს ერთგულება დემოკრატიული კურსისა და ალიანსის საერთო ღირებულებების მიმართ. როგორც ასპირანტმა ქვეყანამ, ჩვენ უკვე დავამტკიცეთ, რომ გვაქვს სურვილი და შესაძლებლობა ხელი შევუწყოთ უსაფრთხოებისა და სტაბილურობის განმტკიცებას ევრო-ატლანტიკურ სივრცში. ამავე დროს, ნატოს გაფართოება და საქართველოს გაწევრიანება ევროპაში უსაფრთხოებისა და სტაბილურობის არეალს გაზრდის, რაც ჩვენს საერთო ინტერესებს ემსახურება,"- განაცხადა მაია ფანჯიკიძემ.
