2017 წელს ნატო-ს საპარლამენტო ასამბლეის საგაზაფხულო სესია საქართველოში ჩატარდება, - ამის შესახებ საპარლამენტო უმრავლესობის წევრმა ირაკლი სესიაშვილმა დღევანდელ პრესკონფერენციაზე განაცხადა და აღნიშნა,რომ გადაწყვეტილება ნატო-ს საპარლამენტო ასამბლეის მუდმივმოქმედმა კომიტეტმა მისი მოთხოვნის საფუძველზე მიიღო.
"ეს არის ძალიან სერიოზული წარმატებაა, ასეთი რამ საქართველოში არ მომხდარა. ეს კიდევ ერთხელ ადასტურებს, რამდენად მხარს უჭერს ნატო საქართველოს ინტეგრაციას და რამდენად ენდობა მას. რაც შეეხება იმას, რატომ 2017 წელი და არა უფრო ადრე, ყველა საპარლამენტო ასამბლეა, როგორც წესი, წინასწარ რამდენიმე წლით ადრე იგეგმება", - განაცხადა სესიაშვილმა.
მისივე ინფორმაციით, უახლოეს ხანებში ჩამოვა შემფასებელთა სპეციალური ჯგუფი, რომელიც სესიის ჩასატარებლად საჭირო ინფრასტრუქტურას ადგილზე შეისწავლის.
საუბარია დაახლოებით, 800-კაციან დელეგაციაზე, რომელთაგან უმრავლესობა საპარლამენტო ასამბლეის წევრია.
