საქართველოსა და ომანის სასულთნოს მთავრობებს შორის, საჰაერო მიმოსვლის შესახებ შეთანხმების პროექტზე მუშაობა დაიწყო. ამ მიზნით, საქართველოს სამოქალაქო ავიაციის სააგენტომ ომანის სასულთნოს სამოქალაქო ავიაციის ხელისუფლებების წარმომადგენლებს უმასპინძლა. როგორც საქართველოს სამოქალაქო ავიაციის სააგენტოში განმარტავენ, აღნიშნული მიზანს, „საქართველოს მთავრობასა და ომანის სასულთნოს მთავრობას შორის საჰაერო მიმოსვლის შესახებ" შეთანხმების პროექტის თაობაზე მოლაპარაკების გამართვა წარმოადგენდა.
მხრიდან შეხვედრას სამოქალაქო ავიაციის სააგენტოს დირექტორი გურამ ჯალაღონია და საქართველოს ეკონომიკისა და მდგრადი განვითარების სამინისტროს ტრანსპორტის პოლიტიკის დეპარტამენტის უფროსი ქეთევან სალუქვაძე ხელმძღვანელობდნენ. ომანის მხრიდან შეხვედრას ესწრებოდნენ ომანის საავიაციო ხელისუფლების წარმომადგენლები.
მოლაპარაკების ფარგლებში, მხარეებმა დეტალურად განიხილეს საქართველოს მიერ შემუშავებული შეთანხმების პროექტის ყველა მუხლი, შეთანხმდნენ შეთანხმების ძირითად პრინციპებზე და მოახდინეს მისი პარაფირება.
ამასთან მნიშნელოვანია ისიც, რომ მხარეთა შორის გაფორმდა ურთიერთგაგების მემორანდუმი, რომლის შესაბამისად, მხარეთა ავიასაწარმოებს უფლება ეძლევათ განახორციელონ პირდაპირი საჰაერო მიმოსვლა მხარეთა სახელმწიფო ტერიტორიებს შორის შეთანხმების ხელმოწერამდე.
„საქართველოს მთავრობასა და ომანის სასულთნოს მთავრობას შორის საჰაერო მიმოსვლის შესახებ" შეთანხმების პროექტი დაფუძნებულია ლიბერალურ პრინციპებზე. შეთანხმების მიხედვით ავიასაწარმოებს ეძლევათ საშუალება დამოუკიდებლად განსაზღვრონ საჰაერო მიმოსვლის ტარიფები, ტევადობა და სიხშირე. საჰაერო მიმოსვლა შესაძლებელი იქნება ქვეყნების ტერიტორიაზე არსებულ ნებისმიერ პუნქტებს შორის, საიდანაც ხორციელდება (შეიძლება განხორციელდეს) საერთაშორისო საჰაერო მიმოსვლა. მეხუთე ჰაერის თავისუფლება წარმოადგენს საავიაციო ხელისუფლებებს შორის დამატებითი შეთანხმების საგანს.
აღნიშნული შეთანხმების ხელმოწერა ხელს შეუწყობს საქართველოსა და ომანის სასულთნოს შორის რეგულარული საჰაერო გადაყვანა-გადაზიდვების განხორციელებას, თავისუფალი კონკურენციის განვითარებას, მომსახურების პირობების ამაღლებას და ტურიზმის განვითარებას.
დღეისათვის საქართველოს 31 ქვეყანასთან აქვს გაფორმებული მთავრობათშორისი შეთანხმება საჰაერო მიმოსვლის შესახებ.
