ე.წ. „გადაფარვის" კომისიის სხდომაზე 22 საკითხიდან, 11-ზე დადებითი გადაწყვეტილება იქნა მიღებული. როგორც ეკონომიკისა და მდგრადი განვითარების მინისტრის პირველი მოადგილე, დიმიტრი ქუმსიშვილი განმარტავს, წინა ხელისუფლების პერიოდში კერძო საკუთრებას ყურადღება არ ექცეოდა, ხოლო ახალი ხელისუფლების პირობებში კი კერძო მესაკუთრეებს საკუთრების საკუთრების უფლება უბრუნდებათ.
„ეკონომიკისა და მდგრადი განვითარების სამინისტროში ე.წ. „გადაფარვის" კომისიის სხდომა ჩატარდა. რომელზეც ვიხილავთ კერძო საკუთრებაში არსებული მიწის საკითხებს და ასევე იმ საკითხებს, რომელზეც სახელმწიფოს რეგისტრაციები არის გადაფარული. კარგადა ცნობილი, რომ წინა ხელისუფლების პერიოდში საკუთრების უფლებას პრაქტიკულად ყურადღება არ ექცეოდა. შესაბამისად, ჩვენ ამ კომისიის მეშვეობით ვახერხებთ იმას, რომ კერძო მესაკუთრეებს ვუბრუნებთ საკუთრების უფლებას. დღეს განხილული იყო 22 საკითხი, აქედან 11 საკითხზე დადებითი გადაწყვეტილება იქნა მიღებული. ნაწილი საკითხებისა იქნა გადადებული ინფორმაციის დასაზუსტებლად, ხოლო ნაწილზე კი იყო უარყოფითი გადაწყვეტილება მიღებული. შესაბამისად, 11 მესაკუთრემ მიიღო იმის შესაძლებლობა, რომ მათ საკუთრებაში არსებული ქონება რეალურად იყოს გამოყენებული ეკონომიკურ ბრუნვაში, სრული შესაძლებლობებით"- განაცხადა დიმიტრი ქუმსიშვილმა.
მისივე განმარტებით, კომისიამ დღეის ჩათვლით უკვე 19 სხდომა ჩაატარა და თითოეულ სხდომაზე საშუალოდ 20 საკითხის გამოტანა და განხილვა ხდება. საშუალო სტატისტიკური ინფორმაციით, კომისიის მიერ განხილული საკითხებიდან თითქმის 60 %-მდე დადებითი გადაწყვეტილებაა მიღებული.