დედაქალაქის უფლებამოსილებაშეჩერებული მერი გიგი უგულავა საქალაქო სასამართლოს მოსამართლეს თხოვნით მიმართავს. უგულავა ითხოვს, რომ თვითმმართველობის არჩევნების თარიღის გამოცხადების შემდეგ მის საქმეზე სასამართლო სხდომები დროებით შეჩერდეს და არჩევნების დასრულების შემდეგ გაგრძელდეს.
არგუმენტად უგულავა საკუთარ პარტიულ საქმიანობას ასახელებს და ამბობს, რომ მოთხოვნის დაუკმაყოფილებლობის შემთხვევაში, მის პოლიტიკურ დევნასთან და ოპოზიციური პარტიის ჩამოშორებასთან დაკავშირებული ეჭვები კიდევ უფრო გაუმყარდება.
ამ თხოვნაზე მოსამართლე გადაწყვეტილებას თვის ბოლოს გამოაცხადებს. მანამდე კი ტელეკომპანია "იმედისა" და რიყის გასხვისების საქმეზე დღეს მორიგი სასამართლო სხდომა გაიმართა.
პროცესზე ბრალდების მხარის მოწმეებს მოუსმინეს. დაიკითხნენ სახელმწიფო აუდიტის სამსახურის მთავარი აუდიტორი და ერთი ექსპერტი, რომლებმაც წინასწარი გამოძიების ეტაპზე დასკვნები მოამზადეს.
ბრალდების მხარის თქმით, ეს დასკვნები ადასტურებს, რომ რიყის გასხვისების დროს საბიუჯეტო თანხა არამიზნობრივად დაიხარჯა.
