,,ნატოს გარეშე საქართველო შესაძლოა, მსოფლიო რუკიდან ისევ გაქრეს და ეს შეიძლება, მალე მოხდეს", _ამის შესახებ, უსუფაშვილმა აღმოსავლეთ ევროპის პარტნიორობის ქვეყნების საპარლამენტთაშორისო თანამშრომლობის სესიის ფარგლებში სიტყვით გამოსვლისას განაცხადა.
დავით უსუფაშვილის განცხადებით, ევროკავშირის ერთიანობა უკრაინის კრიზისისას მნიშვნელოვანია, თუმცა, თუ თანამედროვე მსოფლიოში რომელიმე ქვეყანა საერთაშორისო წესრიგისა და სამართლის წინააღმდეგ წავა, დაუსჯელი არ უნდა დარჩეს.
„სამწუხაროდ, ჩვენ ვნახეთ, რომ 2008 წელს საქართველოში რუსეთის სამხედრო ინტერვენციის შემდეგ რუსეთის ხელმძღვანელობასთან ურთიერთობა ჩვეულებრივ რეჟიმში გაგრძელდა. მსოფლიომ გადაწყვიტა, ეცხოვრა იმ რუსეთის გვერდით, რომელიც არ ასრულებდა ხელშეკრულებებსა და შეთანხმებებს, მათ შორის საფრანგეთის იმჟამინდელი პრეზიდენტის, ნიკოლა სარკოზისა და რუსეთის იმჟამინდელი პრეზიდენტის, დიმიტრი მედვედევის 2008 წლის 12 აგვისტოს შეთანხმებას საქართველოში მშვიდობის დამყარების შესახებ. მჯერა, რომ ეს არ უნდა განმეორდეს და მოხარულები ვართ, რომ ჩვენი უკრაინელი მეგობრები დროულ და შესაბამის მხარდაჭერას იღებენ მათთვის ამ მეტად რთულ პერიოდში", - განაცხადა დავით უსუფაშვილმა.
საქართველოს პარლამენტის თავმჯდომარის განცხადებით, საერთაშორისო სამართლის ნორმებისა და საერთაშორისოდ აღიარებული საზღვრების ცნობა და პატივისცემა მხოლოდ ერთი ქვეყნის პრობლემა არ არის, სწორედ ამიტომ, საქართველო მზადაა ითანამშრომლოს ევროპის ქვეყნებთან.
„მოხარული ვარ, რომ ვილნიუსის სამიტი წარმატებული აღმოჩნდა საქართველოსთვის, სირთულეებისა და ჩვენი ზოგიერთი ევროპელი მეგობრის სკეპტიციზმის მიუხედავად, რომ თითქოს 2012 წელს საქართველოში ხელისუფლების ცვლილების შემდეგ საქართველომ განვითარების კურსი შეცვალა. როგორც ხედავთ, ეს არ მომხდარა. საქართველოს პარლამენტში დღეს წარმოდგენილნი არიან ის პოლიტიკური პარტიები, რომლებიც ერთმანეთს იმაში ეჯიბრებიან, ვის უფრო მეტად სურს ნატოსა და ევროკავშირში გაწევრიანება", - განაცხადა დავით უსუფაშვილმა.
საქართველოს პარლამენტის თავმჯდომარის განცხადებით, ევროპა ქართველი ერის არჩევანია.
„საქართველოს არასდროს დაუტოვებია ევროპა, ჩვენ ძალით ჩამოგვაშორეს ევროპული განვითარების გზას და ახლა გვინდა, უკან დავუბრუნდეთ მას", - აღნიშნა დავით უსუფაშვილმა.
მისივე განცხადებით, იმ ქვეყნებთან, რომლებიც თავს ევროპის ნაწილად მოიაზრებენ, ევროკავშირმა უნდა ითანამშრომლოს და ამისთვის შესაბამისი მექანიზმები აამოქმედოს. ამ ტიპის წარმატებული თანამშრომლობის მაგალითად საქართველოს პარლამენტის თავმჯდომარემ აღმოსავლეთ ევროპის ქვეყნების პარტნიორობის პროგრამა დაასახელა და განაცხადა, რომ ადრე თუ გვიან, ყველა ქვეყანა შეძლებს, გააკეთოს თავისუფალი არჩევანი და პროგრამას შეუერთდეს.
საქართველოს პარლამენტის თავმჯდომარე სიტყვით გამოსვლისას ნატოსა და ევროკავშირის მიერ თავდაცვის ბიუჯეტის გაზრდის საკითხს შეეხო და აღნიშნა, რომ მშვიდობის გარანტირება მხოლოდ დემოკრატიას შეუძლია.
„ჩვენ გვსურს, საქართველო იყოს დემოკრატიული ქვეყანა, შევქმნათ დემოკრატიული ინსტიტუტები, გავზარდოთ ჩვენი ქვეყნის მოქალაქეების თავისუფლება და ამაში თქვენი მხრიდან დახმარება აუცილებელია", - განაცხადა დავით უსუფაშვილმა.
სიტყვით გამოსვლისას საქართველოს პარლამენტის თავმჯდომარემ, საქართველოს ჩრდილო-ატლანტიკურ ალიანსში ინტეგრაციის მნიშვნელობაზეც ისაუბრა.
„ნატოს გარეშე საქართველო შესაძლოა, მსოფლიო რუკიდან ისევ გაქრეს და ეს შეიძლება, მალე მოხდეს. 2008 წლის აპრილში, ნატოს სამიტზე, წევრი ქვეყნები მივიდნენ კონსესუსამდე, რომ საქართველო ნატოს წევრი ქვეყანა გახდება, თუმცა, არც მექანიზმებზე, არც ინსტრუმენტებსა და თარიღზე არ უსაუბრიათ. მჯერა, რომ ეს იყო ერთ-ერთი მიზეზი 2008 წლის აგვისტოში რუსული სამხედრო აგრესიისა. დღეს კიდევ უფრო რთულ მდგომარეობაში ვართ. გვესმის, რომ თუ საქართველო ნატოსკენ ნაბიჯს გადადგამს, ეს რუსეთის მხრიდან მორიგ აგრესიას გამოიწვევს. ჩვენ ვრისკავთ, სწორედ ამიტომ, გვჭირდება პასუხი, რას მოვიმოქმედებთ, თუ საქართველო რუსეთის მორიგი სამიზნე გახდება," - განაცხადა დავით უსუფაშვილმა.
საქართველოს პარლამენტის თავმჯდომარის განცხადებით, საქართველოს პარლამენტი და მთავრობა მზადაა, ითანამშრომლოს ევროკავშირთან.
„მე ვხედავ მზაობას თქვენი მხრიდან. სწორედ ამიტომ, ჩემს ქვეყანაში მეტი ენთუზიაზმით დავბრუნდები, რომ გამოსავალი მოიძებნება, საქართველო დაუახლოვდება ევროპას, გახდება ნატოს წევრი და დემოკრატიული ქვეყანა გახდება რუსეთიც. სწორედ ესაა პრობლემის გრძელვადიანი გადაჭრის გზა", - აღნიშნა დავით უსუფაშვილმა.