პრეზიდენტი გიორგი მარგველაშვილი სრულიად საქართველოსა და ქრისტიანულ სამყაროს ულოცავს ხარების ბრწყინვალე დღესასწაულს და მისალოც განცხადებას ავრცელებს რომელსაც ,,ჯი-ეიჩ-ენი" უცვლელად გთავზობთ: ,,ეს დღესასწაული დიდ ქრისტიანულ დღეთა შორის განსაკუთრებით ამაღელვებელი და სასიხარულოა.‘ახალი' მანამდე ნიშნავდა მორიგ ხდომილებას გარდაცვალება-დაბადების, განადგურება-ქმნადობის უწყვეტ ციკლში.მაცხოვრის შობის ხარებით კი ქალწულ მარიამს, და მისი სახით კაცობრიობას, სრულიად ახლის, არსებითად სხვანაირის მოვლინება, მარადიულისა და უკვდავის განხორციელება ეუწყა.გალილეის პატარა სოფელში, უბრალო ხალხის წიაღში შობილმა ქალიშვილმა იტვირთა გამხდარიყო წიაღი ყველაზე დიდი ჭეშმარიტებისა და კაცობრიობის განახლების, აღორძინების სახელით არსებითად დაუპირისპირდა საგანთა არსებულ წესრიგს. ამ მოვლენის სიდიადე აქცევს ხარების დღესასწაულს კაცობრიობის ისტორიაში ერთ-ერთ ყველაზე ამაღლებულ და ამავე დროს, დრამატულ მოვლენად. დაე, ეს დღესასწაული ჩვენი ქვეყნის, ჩვენი ოჯახების, ჩვენი შინაგანი სამყაროს განახლებისა და გაძლიერების საწინდარი ყოფილიყოს.ხარების მადლი შეეწიოს ჩვენ ქვეყანას", _ნათქვამია პრეზიდენტის მისალოც ტექსტში.
მასალის გამოყენების პირობები
