საქართველოში მეცხვარეობის განვითარების საკითხებზე ისაუბრეს სამუშაო შეხვედრაზე, რომელიც დღეს, 5 აპრილს ეკონომიკისა და მდგრადი სამინისტროში გაიმართა.
შეხვედრაზე დაისვა ადგილობრივი მეცხვარეობის დარგის განვითარებისთვის მნიშვნელოვანი საკითხები, მათ შორის, საუბარი წარიმართა ზამთრის საძოვრებისა და ცხვრის გადასარეკი ტრასების მოწყობაზე, მთის რეგიონების მოსახლეობისთვის ფინანსური და სხვა სახის დახმარების გაწევაზე მეცხვარეობის აღორძინების მიზნით.
შეხვედრაში მონაწილეობდნენ ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, სოფლის მეურნეობის მინისტრი შალვა ფიფია, რეგიონული განვითარებისა და ინფრასტრუქტურის მინისტრი დავით ნარმანია და რეგიონული პოლიტიკისა თვითმმართველობის საპარლამენტო კომიტეტის თავმჯდომარე ერეკლე ტრიპოლსკი. შეხვედრას ასევე დაესწრნენ ყაზბეგისა და დუშეთის რაიონების მაჟორიტარი დეპუტატები და მეცხვარეთა ასოციაციების წარმომადგენლები.
ვიცე-პრემიერის, ეკონომიკისა და მდგრადი განვითარების მინისტრის გიორგი კვირიკაშვილის განცხადებით, მთავრობაში განიხილება მიწის სახელმწიფო ფონდიდან კლასტერების გამოყოფის საკითხი, სადაც მოეწყობა საქართველოს ტერიტორიაზე ზამთრის საძოვრები აგრეთვე მოგვარდება გადასარეკი ტრასების პრობლემაც. გიორგი კვირიკაშვილმა ასევე აღნიშნა მთის მოსახლეობისთვის ცხვრის მოშენების მიზნით მინი-გრანტების გამოყოფის შესაძლებლობის შესახებ.
შეხვედრაზე ასევე გადაწყდა დარგის განვითარების პროგრამის მომზადება, რომელსაც საქართველოს მთავრობა განახორციელებს.
