ზაქარეიშვილის განცხადებას უცვლელად გთავაზობთ:
"ვინაიდან პროკურატურა ცდილობს ეჭვქვეშ დააყენოს ჩემს მიერ გამოქვეყნებული ალტერნატიული სასამართლო სამედიცინო ექსპერტიზის ობიექტურობა და სრულყოფილება, აღნიშნულ საკითხთან დაკავშირებით მსურს გავაკეთო გარკვეული განმარტება:
1. პროკურატურა ეჭვქვეშ აყენებს ფოტომასალის ავთენტურობას შალვა თათუხაშვილის გვამთან მიმართებაში, განსაკუთრებით ექსპერტიზის დასკვნაზე თანდართული ფოტომასალის იმ ნაწილთან დაკავშირებით, სადაც აღბეჭდილია მხოლოდ ფეხები. ამასთან დაკავშირებით განვმარტავ, რომ ჩემს მიერ ექსპერტიზაზე წარდგენილი იქნა ფოტომასალა 70 ეგზემპლიარის ოდენობით, რომელთა ანალიზის შედეგად დასკვნას წესისამებრ დაერთო 14 ფოტოსურათი - გამოკვლევის ნაწილში აღწერილი გარემოებების ვიზუალური წარმოჩენისათვის. ცხადია, ექსპერტს ნანახი აქვს გვამის მთლიანი ფოტომოცემულობა და მასზე არსებული დაზიანებები. ორივე ფეხის ფოტომასალის გვამთან ავთენტურობაში ეჭვი რომ შეეტანა, ექსპერტიზას არ ჩაატარებდა, გასცემდა დასკვნას. პროკურატურას ვთავაზობ, დანიშნოს შესაბამისი ექსპერტიზა სადავო ფოტოსურათზე ასახული ორი ფეხის გვამთან ავთენტურობასთან მიმართებაში. აქვე აღვნიშნავ, რომ ჩემს მიერ გვამის ფოტოფიქსაციას ოჯახის წევრევბთან ერთად ესწრებოდა არაერთი სხვა პირი, რომელთაც შეუძლიათ მისცენ შესაბამისი განმარტებები.
2. პროკურატურა აცხადებს, რომ ალტერნატიული სასამართლო-სამედიცინო ექსპერტიზის შედეგებით განსაზღვრულია შ. თათუხაშვილის გვამზე არსებული დაზიანებების მხოლოდ სავარაუდო დრო. ამ საკითხთან დაკავშირებით აღვნიშნავ, რომ ხსენებული ექსპერტიზის დასკვნითი ნაწილის მე-3 ნაწილის მეორე წინადადების თანახმად, ".სასამართლო-სამედიცინო ექსპერტიზის პრაქტიკაში დაზიანებების ზუსტი დადგენა (საათი, დღე და ა.შ.) შეუძლებელია სათანადო მეთოდიკის არარსებობის გამო". ამდენად ნათელია, რომ არამარტო თათუხაშვილის დაზიანებებთან მიმართებაში, არამედ ზოგადად ხსენებული ტიპის ექსპერტიზის ჩატარებისას, სათანადო მეთოდიკის არარსებობის გამო, შეუძლებელია დაზიანებების ზუსტი დროის დადგენა.
3. პროკურატურა ალტერნატიულ ექსპერტიზის დასკვნას წუნს სდებს იმაშიც, რომ გვამზე არსებულ დაზიანებებთან დაკავშირებით არ ჩატარებულა ლაბორატორიული კვლევები, გვამიდან არ იქნა აღებული კანის პრეპარატები. აღნიშნულთან დაკავშირებით განვმარტავ, რომ ალტერნატიული ექსპერტიზის დასკვნითი ნაწილის მე-5 პუნქტის თანახმად, გვამზე არსებული დაზიანებების ხასიათის და ხანდაზმულობის განსაზღვრა წარმოებს მხოლოდ დაზიანებების ვიზუალური დათვალიერება-კვლევის შედეგად და კანის პრეპარატების ამოჭრა ჰისტოპათომორფოლოგიური გამოკვლევსიათვის არ ხორციელდება. აღნიშნული კვლევა ტარდება მხოლოდ მაშინ (და ისიც იშვიათ სმთხვევაში) - როდესაც საჭიროა დადგინდეს, დაზიანებები მიყენებულია სიკვდილამდე თუ სიკვდილის შემდეგ. შალვა თათუხაშვილის გვამზე აღმოჩენილი დაზიანებები კი - სიცოცხლისდროინდელია და ეს საკითხი სადავო არ არის.
4. პროკურატურა ეჭვქვეშ აყენებს ექსპერტიზის ჩასატარებლად ჩემს მიერ წარდგენილი მასალის საკმარისობას. აღნიშნულთან დაკავშირებით, დასკვნის მე-4 ნაწილში იმპერატიულად მითითებულია, რომ "ექსპერტიზაზე წარმოდგენილი შალვა თათუხაშვილის გვამის დათვალიერების ოქმი და ფოტომასალა, მთლიანობაში სრულყოფილია, რადგან იძლევა სხეულზე არსებული დაზიანებების ხასიათზე და ხანდაზმულობაზე მსჯელობის საშუალებას.
გარდა აღნიშნულისა, მსურს თხოვნით მივმართო საინფორმაციო საშუალებებს კარგად გაეცნონ, გააანალიზონ და გაავრცელონ შ. თათუხაშვილის გვამზე ჩატარებული ალტერნატიული სასამართლო-სამედიცინო ექსპერტიზის დასკვნა", -ნათქვამია ზაქარეიშვილის განცხადებაში.