ეკონომიკის და და მდგრადი განვითარების მინისტრის პირველი მოადგილე დიმიტრი ქუმსიშვილი ფოთის პორტში არსებული ტერმინალების თანამშრომლებს შეხვდა, რომლებმაც ფოთში დღეს აქცია გამართეს და სახელმწიფოსგან დახმარება მოითხოვეს.
როგორც აქციის მონაწილეებთან შეხვედრაზე ეკონომიკის და და მდგრადი განვითარების მინისტრის პირველმა მოადგილემ აღნიშნა, მთავრობა საკითხს დეტალურად შეისწავლის და მიიღებს ისეთ გადაწყვეტილებას, რომელიც არც ერთ მხარეს არ დააზარალებს: „ვფიქრობთ, რომ კომპრომისული გამოსავალი ნამდვილად არსებობს იმისთვის, რომ თავად პორტმაც მოახერხოს თავისი საქმიანობის გაფართოვება და ამავე დროს, ტერმინალებში დასაქმებულმა ადამიანებმაც შეინარჩუნონ თავიანთი სამუშაო ადგილები" - აცხადებს დიმიტრი ქუმსიშვილი. მისივე თქმით, ყოველი სამუშაო ადგილი ნიშნავს დაპურებულ ოჯახს და ხელისუფლებისთვის ძალიან მნიშვნელოვანია თითოეული დასაქმებული ადამიანი ბედი. „ვაგრძელებთ მოლაპარაკებებს, რომ ერთის მხრივ, „ეი პი ემ ტერმინალმაც" შეძლოს ბიზნესის გაფართოება და ამავდროულად, პორტში არსებულმა სხვა ბიზნესებმაც გააგრძელონ თავიანთი საქმიანობა"- აღნიშნა დიმიტრი ქუმსიშვილმა.
კომპანია „ეი პი ემ ტერმინალს ფოთისა" და აქციის მონაწილეებთან მოლაპარაკებებში ეკონომიკის სამინისტროსთან ერთად ჩართულები არიან ფოთის მერის მოვალეობის შემსრულებელი ვასილ თოდუა, ფოთის საკრებულოს თავმჯდომარე დავით ბაბილუა და სხვა სახელმწიფო უწყებების წარმომადგენლები. მხარეები იმედოვნებენ, რომ პრობლემა მალე მოგვარდება და მოხდება შეთანხმება, სადაც გათვალისწინებული იქნება როგორც აქციის მონაწილე თანამშრომლების, ისე კომპანიის ინტერესები.